Ил Түмэн 20-с (уочараттаах) пленарнай мунньаҕар норуот дьокутааттара өрөспүүбүлүкэ 2027 сылга уонна 2028 – 2029 сылларга былааннанар кэмҥэ судаарыстыба бүддьүөтүн барылын бастакы ааҕыыга ылыннылар. Ол иһигэр “тыа хаһаайыстыбатыгар уруккутааҕар икки төгүл аҕыйах үбү көрөннөр, салааны букатыннаахтык эстэр суолга анньан эрэллэрин туһунан” сурах-садьык тарҕаммыта төһө оруннааҕый?
Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов парламент үлэтин ис дьиҥин билбэт дьон аймалҕаны таһааралларын этэр.
“Бастакы ааҕыы бэрээдэгин быһыытынан, өрөспүүбүлүкэбит “Тыа хаһаайыстыбатын сайыннарыы итиэннэ тыа хаһаайыстыбатын бородууксуйатын, сырьетун уонна аһын-үөлүн ырыынактарын сүрүннээһин” судаарыстыбаннай бырагырааматын үбүн сүрүн үллэрээччилэргэ – туһааннаах министиэристибэҕэ уонна бэтэринээрийэҕэ туһаайан 6,9 млрд солкуобай кэриҥинэн бигэргэннэ. Урукку сылларга даҕаны бастакы ааҕыы кэриҥэ (параметра) 7-8 млрд солкуобайтан элбээччитэ суох. Ким интэриэһиргиир тэҥнээн көрүөн сөп. Биһиги, биллэн турар, үбүлээһин кээмэйэ инники сыллартан кыччаабатыгар сыаллаан күннэтэ үлэлэһэ сылдьабыт”, – диэтэ Александр Павлович.
Тыа хаһаайыстыбатын уонна ас-үөл бэлиитикэтин министиэристибэтин экэниэмикэҕэ уонна стратегияны былааннааһыҥҥа департаменын салайааччыта Инна Оконешникова бастакы ааҕыыга 6,84 млрд солкуобай суумалаах үбүлээһин ылыллыбытын, мантан 2 млрд солкуобайа биир бырагыраамаҕа олорсо сылдьар бэтэринээрийэ киэнэ буоларын быһааран биэрдэ.
“Онон министиэристибэ үллэриэхтээх өлүүтүгэр тиксибит 4,8 млрд солкуобай кээмэйдээх үптэн судаарыстыбаннай киэптээх тэрилтэлэр, улуустардааҕы тыа хаһаайыстыбаларын салалталарын үлэлэрин-хамнастарын хааччыйыыга уонна 2,5 млрд солкуобайа үүт аһы оҥорон таһаарыыга туттуллуохтара. Быйыл тыа хаһаайыстыбатын үбүлээһин кээмэйэ бүтэһиктээх ааҕыынан 10,6 млрд, бэтэринээрийэлиин 12,6 млрд солкуобайга тэҥнэстэ. Дьиҥинэн, 2026 сыл саҥатыгар 13,5 млрд солкуобай ылыллыбыта. Үүнэр сыл саҕаланыытыгар эмиэ кырата оччо үп баар буолуохтааҕын “эккирэтэбит”. Биһиги өрөспүүбүлүкэбит тыатын хаһаайыстыбатын илэ-чахчы сайыннарарга 15 млрд солкуобайы көрдүүбүт”, – диир Инна Иннокентьевна.
Бүддьүөт барылын иккис ааҕыы Ил Түмэн сэтинньи 25-26 күннэригэр ыытыллыахтаах 21-с пленарнай мунньаҕын бэбиэскэтигэр киллэриллибит. Өрөспүүбүлүкэбит салалтата хайа даҕаны кэмҥэ тыа хаһаайыстыбатын күннээҕи ас-үөл кыһалҕатын эрэ быһаарар боппуруос курдук көрбөккө, уһук хотугу эрэгийиэн төрүт норуоттарын олохторун укулаатын быһыытынан харыстабыллаах сыһыаны тутуһан, утумнаан кэллэ. Бу тирээн турар күҥҥэ-дьылга үп-харчы төһө даҕаны кырыымчыгын иһин, Ил Дархан уонна бырабыыталыстыба тыа хаһаайыстыбатын үбүлээһин таһыма намтатыллыа суохтааҕын мэктиэлииллэр.
Василий Никифоров
Читайте нас в:
