Күһүҥҥү хомуур бүтэһиктээх түмүгэ таҕыста. Арай, Сахастат ыаллар үүннэрбит хортуоппуйдарын, оҕуруоттарын аһын дааннайыгар көннөрүү киллэриэн сөп. Ол бүттүүн көрдөрүүгэ улаханнык сабыдыаллыа суоҕа.
Хомуур үлэтэ балаҕан ыйын бастакы күннэриттэн саҕаланан баран, күһүн уһаан уонна сөҥүү сири-буору илитэрдии түспэккэ, үүнүү барыта сөптөөх кэмигэр ылыллыбытын Тыа хаһаайыстыбатын уонна ас-үөл бэлиитикэтин министиэристибэтин сиртэн үүнүүнү ылыыны, сир үлэтин салааларын уонна мелиорацияны сайыннарыыга департаменыгар иһитиннэрдилэр. Бурдуктан ураты көрүҥнэргэ – хортуоппуйга уонна оҕуруот аһыгар былааннаммыт көрдөрүүлэр туоллулар.
Быйыл саас туораахтаах култуура 11 188 гектар иэннээх бааһынаҕа ыһыллыбытыттан хомуйуллуохтааҕа – 10 932 гектар. Орто үүнүүгэ 1 гектартан 11,3-түү сэнтиниэр кэлиэхтээҕинэн суоттаан, 14 тыһ. туонна бурдук ылыллара былааннаммыта. Баалабай хомуур, гектартан 10,7 сэнтиниэр үүнүү хомуйуллан, 11 071 туонна буолла. Ити былаан 79 уонна былырыыҥҥы үүнүү (14 989 туонна этэ) 74 бырыһыаныгар тэҥ.
Бары киэптээх хаһаайыстыбаларга 70,9 тыһ. туонна хортуоппуй үүнүүтэ ылыллара былааннаммыта. Гектартан ортотунан 114,6 сэнтиниэр хомуйуллан, 6 187 гектартан 70 919 туонна хортуоппуй үүнүүтэ ылылынна. Онон “иккис килиэп” былаана 100 бырыһыан туолла.
Оҕуруот аһа, бүрүөһүннээх уонна аһаҕас олордуллардыын холбоон, 28,8 тыһ. туонна үүнүү ылыллара былааннаммыта кыратык куоһарылынна: 100,8 бырыһыан, эбэтэр 1 285 гектартан 29 071 туонна оҕуруот аһа, ол иһигэр бүрүөһүннээҕэ – 9 155 туонна, хомуйулунна. Ортотунан гектартан 155 сэнтиниэр кэллэ.
Василий Никифоров
Читайте нас в:
