Сыл ахсын алтынньы 29 чыыһылатыгар, уруккута Комсомол күнүгэр, интернет ситимигэр баян туппут кырачаан уол “Аалай уоттаах сулуһум!..” диэн доргуччу ыллыыр видеота тарҕанар. Бу видеоҕа – Ньурба улууһуттан төрүттээх Артем Васильев. Чаҕылхай уолчаан билигин ханна тиийдэ? Салгыы Улус.Медиа ыстатыйатыгар ааҕыҥ!
Артем Васильев билигин номнуо 11 саастаах, 5 кылааска үөрэнэр. Васильевтар дьиэ кэргэн Ньурба улууһун Марха нэһилиэгэр олороллор. Артем – ыал саамай кырачаана, бэйэтин иннинэ 2 эдьиийдээх.
“Ити видеоны 2018 сыллаахха устубуппут, Артем баара-суоҕа 3 саастааҕар. Ол кэмҥэ кини киэһэ аайы биһиэхэ кэнсиэр көрдөрөр идэлэнэ сылдьыбыта. Олортон биирдэстэригэр “Эн, комсомол – мин дьолум!” ырыаны ыллаабытын устаммыт, аймахтар бөлөхтөрүгэр ыыппыппыт тарҕанан хаалбыт этэ. Онтон ыла Артему дьон көрөн билэр, сураһар буолбута, оннооҕор уулуссаҕа көрүстэхтэринэ хаартыскаҕа түһээччилэр”, — диэн кэпсиир Артем ийэтэ Марина.
Видео уһуллар кэмигэр Артем 3-тээх эрэ диэтэххэ, кимнээҕэр үчүгэйдик ыллыырын киһи сөҕө-махтайа көрөр.
Ийэтэ этэринэн, уол олус эрдэ саҥарбыт эбит, ол да иһин буолуо, ырыа ыллыырын эмиэ наһаа сөбүлүүр:
“Ырыанан билигин да дьарыктанар. Соҕотохтуу ыллыыр, араас куонкуруска, фестивальга көхтөөхтүк кыттар. Холобура, “Хотугу сулус” (“Полярная звезда”) өрөспүүбүлүкэтээҕи күрэххэ миэстэлэһэн турардаах, быйыл өссө дойдубут килбэйэр киинигэр Москваҕа тиийэн I истиэпэннээх лауреат аатын сүкпүтэ. Итинник аахтахха, ситиһиитэ добуоччу”.
Артем кыра эрдэҕиттэн төрөөбүт дойдутугар наһаа бэриниилээх эбит. «Кини ханна да тиийдэр, Сахатын сирин уонна Ньурбатын өрө тутар, оннооҕор былааҕын илдьэ сылдьар», — диэн Марина кэпсиир.
Уолчаан улааттаҕына ким буоларын чопчу быһаарына илик. “Билиҥҥи туругунан суоппар, дальнобойщик буолуон баҕарар, — диэн ийэтэ күлэр. — Ол быыһыгар, музыкальнай колледжка киирэрим буолуо да диир. Аҕата, эһэтэ уонна убайдара бары суоппар буоланнар, кини эмиэ ону ымсыырар быһыылаах, массыыналары сөбүлүүр, сэҥээрэр. Биһиги, төрөппүттэр буоларбыт быһыытынан, оҕобутун барытыгар өйүүбүт, тугунан да дьарыктанарын боппоппут, бэйэтин сүрэҕэ сытар дьыалата эрэ буоллун”.
Билиҥҥи оҕолор үксүн телефоҥҥа оонньуур эбит буоллахтарына, Артем тыыннаах сэһэргэһиини, доҕотторунаан илэ көрсөн оонньуурун ордорор диир ийэтэ: “Дьээбэлээн, “Кыһыл кинигэҕэ” киирбит оҕолоргут диэн ааттыыбын. Чахчы, таһырдьа сылдьаннар олох чуҥкуйбаттар – штаб тутталлар, велосипедынан таһынааҕы дэриэбинэҕэ баран кэлэллэр… Дьарыктара элбэх. Телефону киэһэ эрэ кэлэн көрөр, ону да ситэ көрбөккө утуйан хаалар”.
Бу курдук баяннаах ырыаһыт уолчааммыт Артем Васильев номнуо улаатан, ыал тутаах көмөлөһөөччүтэ буола сылдьар. Васильевтар дьиэ кэргэттэригэр дьолу, бары үтүөнү баҕарабыт!
Хаартыскалар: Васильевтар дьиэ кэргэн архыыбыттан
Өссө ааҕыҥ:
Тутум эргииргэ рекорд туруорбут Арсений Эверстов: «Улааттахпына саха дэгит көрүҥнэрин күрэҕэр кыттыахпын баҕарабын»
Читайте нас в:
