Бу күннэргэ 5 кылаас үөрэнээччитэ Арсений Эверстов тутум эргииргэ Саха сирин үрдүнэн саҥа рекорду олохтоото диэн сонун социальнай ситимнэри тилэри көппүтэ. Сымса уолчаан икки мүнүүтэ иһигэр 79 эргийиини оҥорон, Дыгын оонньууларын чемпионун Вячеслав Дьяконов рекордун 3 эргииринэн куоһарбыт. Бүгүн Арсений төрөппүттэринээн Наталья уонна Ариан Эверстовтары кытта Улус.Медиаҕа ыалдьыттаатылар.
Элбэх оҕолоох Эверстовтар дьиэ кэргэн Булун улууһун Күһүүр нэһилиэгэр олороллор. Наталья уонна Ариан түөрт оҕолоохтор: Арсений, Арианна, Айсена уонна Ариэла. Ыал ийэтэ бухгалтер идэлээх, аҕалара олохтоох дьаһалтаҕа үлэлиир. Дьиэ кэргэн улахан оҕото Арсений 5 кылааска «туйгун» уонна «үчүгэй» сыаналарга үөрэнэр, спордунан таптаан дьарыктанар, балтыларыгар үтүө холобур буолар.
«Арсений спорт өттүгэр интэриэстээҕэ өссө оҕо уһуйааныгар сылдьар эрдэҕинэ биллибитэ. Төрүт көрүҥнэринэн дьарыктанан саҕалаабыта 1,5 сыл буолла. Чуолаан тутум эргииргэ бэйэтэ ис иһиттэн баҕаран туран ылсыбыта, оннооҕор аҕатыгар дьиэҕэ эрчиллэр тэрил оҥотторбута», — кэпсииллэр Наталья уонна Ариан.
Уоллара многоборьены сөбүлүүрүн бэлиэтии көрөн, төрөппүттэрэ Арсенийы сынньалаҥ кэмигэр Дыгын оонньууларын призеругар Николай Матаннановка, «Хоһуун» спортивнай кулуупка суруттарбыттар. Быйыл бу дьарыкка сылдьыбыта бэлиэр иккис сыла.
Саха сиригэр тутум эргииргэ эр дьон рекордун Арсений сыл аайы Тиксиигэ ыытыллар «Дети Севера» күрэххэ бу саас кытта сылдьан толорбут эбит. Ол эрээри кини рекордун туһунан дьоно билигин эрэ дьэ кэпсээн, социальнай ситимнэргэ таһаарбыттар эбит.
«Спорт көрүҥнэриттэн сүрүннээн сүүрүүнү, ыстаныыны уонна тутум эргиири ордук сөбүлүүбүн. Тутумҥа улахан дьон рекордун куоһарбыппыттан мин олус соһуйбутум уонна үөрбүтүм. Сыл аайы ыытыллар Дыгын оонньууларын сэргээн көрөөччүм. Улааттахпына саха дэгит көрүҥнэригэр холонон, күрэхтэргэ кыттан көрүөхпүн баҕарабын», — диэн үллэстэр Арсений.
Арсений иллэҥ кэмигэр дьарыктанарын сөбүлүүр диэн төрөппүттэрэ кэпсииллэр. Кини бэйэтин сааһыгар номнуо дьиэ ис-тас үлэтиттэн толлубакка дьонугар көмөлөһөр, булт-алт өттүгэр аҕатын уонна эһэтин кытта сылдьыһар.
Ити курдук ийэ, аҕа быһыытынан Наталья, Ариан Эверстовтар оҕолорун бүтүннүү өйүүллэр. «Төһө кыалларынан кинилэргэ үчүгэй, көнө майгыны-сигилини, үтүө санааны иитэ сатыыбыт. Дьон сиэринэн сылдьарга үөрэтэбит. Атын төрөппүттэргэ сүбэлиэ этибит: оҕоҕут сэҥээрэр дьарыгын, идэтин утарбакка, күүс-көмө, өйөбүл буола сылдьыҥ», — диэн кинилэр кэпсэтии түмүгэр бэлиэтээтилэр.
Читайте нас в:
