САХА СИРЭ. АММА УЛУУҺА. Кулун тутар 20 күнэ — ULUS.MEDIA. Соторутааҕыта Сатаҕайтан төрүттээх урбаанньыт, Дьокуускай куорат олохтооҕо Михаил Неустроев Амма-Дьокуускай-Амма хайысхатынан инклюзивнай социальнай такси сырыытын тэрийбитэ. Маннык быһыылаах такси өҥөтө өрөспүүбүлүкэҕэ биир бастакынан Аммаҕа тэриллибитэ кэрэхсэбиллээх. Билигин бу такси өҥөтүнэн төһө элбэх киһи туһанарын, массыыналар доруобуйаларынан хааччахтаах, кырдьаҕас, кыаммат дьоҥҥо туох уратылаахтарын «Амма олоҕо» билистэ.

Бу туһунан “Тобул” ХЭТ инклюзивнай социальнай такси суоппара Константин Яковлев маннык кэпсиир:

«Күн бүгүн Амма-Дьокуускай-Амма хайысхатынан 2 массыына сүүрэр. Бэйэм 7 миэстэлээх Митцубиси Деликаҕа суоппардыыбын. Сакаас төһө киирэринэн сылдьабыт. Таксибыт биир сүрүн уратытынан кырдьаҕас, кыаммат дьоҥҥо көмөлөһүү буолар. Инбэлииттэргэ, пенсионердарга чэпчэтиилээх. Дьиэлэригэр киллэрэн биэрэбит, малларын таһаарсабыт. Массыынабыт багажниктаах, кэлээскэлээх инбэлииккэ пандустаах, анал миэстэлээх. Онон киирэргэ, тахсарга усулуобуйа тэрилиннэ. Билигин суол халтараан, бытааннык сылдьабыт уонна оттон уопсайынан саастаах дьон бытаан сырыыны ордорор. Дьон махтанар, сымнаҕас, үчүгэй дииллэр, бука бары ситиһиилэри баҕараллар”.

Онтон урбаанньыт Михаил Неустроев суоппардар инклюзивнай социальнай таксига анал сүүмэрдээһини ааһалларын, көҥүл ылан үлэлииллэрин туһунан бэлиэтээтэ.