Сарсыҥҥыттан, алтынньы 24 күнүттэн, үгэскэ кубулуйбут “Саха сирин балыга” өрөспүүбүлүкэтээҕи дьаарбаҥка Дьокуускайга 15-с төгүлүн ыытыллаары турар. Киин куоракка кыстык хаар түһэ уонна халлаан тымныйа илик эрээри, тоҥ балык атыыта-тутуута, өрүү буоларын курдук, Хомсомуол болуоссатыгар үс күнү быһа түһүлгэлэниэ.
Дьаарбаҥканы сүрүн тэрийээччи – Тыа хаһаайыстыбатын уонна ас-үөл бэлиитикэтин министиэристибэтин хотугу төрүт салаалары, балык хаһаайыстыбаларын сайыннарыыга уонна үлэ харыстабылыгар отделын салайааччыта Иннокентий Баланов иһитиннэрэринэн, анаммыт күннэргэ 60-ча туонна балык атыыланара сабаҕаланар. Дьон хамаҕатык атыылаһар буоллаҕына, ити кээмэйтэн таһымныан даҕаны сөп. “Мальчиков” уонна “Магдебург” уу ааллара хотугу улуустартан сайын-күһүн бултаммыт балыктары бу күннэргэ тиэйэн аҕалбыттар. Булуҥ, Усуйаана, Аллараа Халыма, Үөһээ Халыма, Эдьигээн улуустарыттан балыктааһын салаатыгар быһаччы үлэлии сылдьар 11 хаһаайыстыба кыттара сыана удамыр буолуоҕун мэктиэлиир. Кинилэри сэргэ Дьокуускай куораттан балыгы астыыр-үөллүүр тэрилтэлэр уонна урбаанньыт-эргиэмсиктэр эмиэ кыттыахтара.
“Төһө даҕаны сайыҥҥытын иһин, билигин идэтийэн балыктыыр хаһаайыстыбалар “шоковай” ньыманан тоҥорор буоланнар, муус аннынан балыктанартан итэҕэһэ суох хаачыстыбалаах. Күндүөбэйтэн саҕалаан тууччаҕар тиийэ күндү балык көрүҥэ барыта баар буолуоҕа. Ону таһынан, биллэн турар, аатырар Ньидьили собото атыыланыа”, – диир Иннокентий Михайлович.
Бэлэм атыы-тутуу былаһааккатын эти уонна эт бородууксуйаны оҥорон таһаарар хаһаайыстыбалар, тэрилтэлэр эмиэ туһаныахтара. Дьаарбаҥка ити курдук олохтоох оҥорон таһаарааччылары барыларын өйүүр, дьоҥҥо-сэргэҕэ биллэрэр соруктаах. Ол гынан баран, бу күннэргэ балыксыт хаһаайыстыбалар уһулуччу тутуллуохтара: сайыҥҥы балыктааһын түмүгүнэн бастыҥ көрдөрүүлээхтэргэ наҕараадалар уонна дьаарбаҥка кыттааччыларыгар 15-с төгүлүн ыытыллар үбүлүөйдээх дьаарбаҥка сувенирдара туттарыллыахтара. “Чукча” аныгы хотугу ас-үөл эрэстэрээнин шеф-асчыта “Индигирка” салааты хайдах астыыры көрдөрүө.
Дьаарбаҥка кэмигэр кыттааччылар уонна атыылаһааччылар итии аһылыктаах кафеҕа үссэниэхтэрэ. Тэрээһин бээтинсэ, субуота, өрөбүл күннэргэ сарсыарда 10 чаастан киэһэ 6 чааска диэри тилэри үлэлиирэ былааннанар.
Василий Никифоров
Хаартыскалар – Тыа хаһаайыстыбатын уонна ас-үөл бэлиитикэтин министиэристибэтин пресс-сулууспатын архыыбыттан туһанылыннылар.
Читайте нас в:
