«Төрөөбүт төрүт дойдуҥ хантан саҕаланарый», — диэн ырыа хомоҕой тылларыгар тиһиллэр. Хас биирдии киһи сүрэҕэр төрөөбүт сирэ — кини сүүрэр ыллыгыттан саҕаланар. Бу ыллыктар киэҥ аартыкка түмүллэн бүтүн дойдубут араас норуоттарын сомоҕолуур Арассыыйа Федерацията буолабыт. Бүгүн дойдубут бэлиэ күнэ. Бу күн чэрчитинэн П.А.Ойуунускай аатынан Судаарыстыбаннас музейа уонна улуустааҕы «Бастыҥнар» хамсааһыннарын лидердара үлэлииргэ сөбүлэҥ түһэристилэр.
Бииргэ үлэлииргэ кэпсэтии эрдэ бу күһүн саҕаламмыта. Улуустааҕы «Сатабыл» оҕо айымньытын дьиэтин педагог-организатора, Таатта улууһун «Үрдэл» биир сомоҕо оҕо хамсааһынын куратора М.Д.Алексеева уонна Р. С. Унарова улууска «Бастакылар» оҕо хамсааһынын салайааччыта, «Бастыҥнар» хамсааһыннарын лидердара Былатыан Ойуунускай төрөөбүт күнүн тэрээһинигэр кэлэн кыттан, санааларын сайа эппиттэрэ, улууспут биир эмэ историческай суолталаах бэлиэ сирин көрөргө-харайарга ылсар баҕалаахтарын биллэрбиттэрэ. Бу эппит тылларын олоххо киллэрэн, Арассыыйа күнүн көрсө, биһиги музейы кытта кыттыгас тэрээһин ыытылынна.
Тэрээһиммит улууспут биир бэлиэ сиригэр — «Саппыйа» алаастан саҕаланна. Икки сыллааҕыта улууспут ытык мааны бэтэрээнэ, Чөркөөх музейын салайбыт Н.Е.Попов хас да сыллаах туруорсуутунан Мойуор Кулаковскай балаҕана сөргүтүллүбүтэ. Онон бу киэҥ куоҥ, сөрүүн балаҕаҥҥа оҕолору кытары көрсүһүү саҕаламмыта. Мойуор Кулаковскай көмүлүөк оһоҕо оттуллан тэрээһин сылаас сыһыанын эргиччи олохтообута.
Музей сэбиэдиссэйэ Михаил Аржаков бу алаас, Мойуор Кулаковскай балаҕана историческай суолтатын, мантан чугас кыра Былатыан күн сирин көрбүтүн, бу эргин сүүрэн-көтөн орох тэппитин, сөтүөлээбит, куйуурдаабыт күөлэ Халамнаайы чугаһын кэпсээтэ. ,,Дойдубутугар оҕолору түмэр Бастакылар хамсааһыннара урукку пионерскай организация үтүө өрүтүн ылынан тэрилиннэ. Араас тэрээһиннэргэ, хамсааһыннарга кыттан үлэтин көрдөрөр. Саха сирин бастакы Президенэ Михаил Николаев — Былатыан барытыгар бастакы этэ диэн эппитэ. Эһиги — Бастакылар хамсааһыннара — Былатыан Ойуунускайы кытары сыһыаннаах бэлиэ сири шефствоҕа ылбыккыт туһунан символическай көстүү. Онон кытаатан төрөөбүт дойдубутугар үйэ саас хаалар гына айан-тутан, үлэлээн ааспыт дьоммутун үөрэтиҥ, сыаналааҥ», — диэн эттэ.
Салгыы Михаил Аржаков уонна улууспут Бастакылар оҕо хамсааһыннарын лидерэ Инна Максимова бииргэ үлэлиир сөбүлэҥҥэ илии баттаатылар.Бу күн оҕолор шефствоҕа ылбыт, кыракый Былатыан билии-көрүү аартыгар үктэл үүннэрбит, буһан-хатан тахсарыгар кынаттаабыт
Халамнаайы күөлэ ураты суолталааҕын көрдөрөр «Оҕо куйуурдуу турара» мэҥэ өйдөбүнньүк бэлиэ сирин ыраастаан, беседканы кырааскалаан төрөөбүт дойдуларын ыллыгын тупсаран субуотунньук ыыттылар.
С. Халгаева
Хаартыскаҕа: тэрээһинтэн түгэннэр
Читайте нас в:
