Быйылгы Бокуруоп таҥара күнүгэр, ол эбэтэр алтынньы 14 чыыһылатыгар, Саха сиригэр былыттаах халлаан турбута уонна соҕурууттан тыалырбыта. Күн-дьыл билгэтэ этэринэн, ити күн сылаас буоллаҕына, кыһын кэлиитэ 40 хонук уһуур диэн буолар. Ол аата улахан тымныы сэтинньи 21 күнүттэн эрэ түһүөхтээх, кыһын устата ичигэс халлаан туруохтаах. Бу туһунан норуот синоптига Тарас Тарасов-Тускул «Саха» НКИХ биэриитигэр кэпсээтэ. Салгыы Саха сирин улуустарыгар бу нэдиэлэтээҕи күн-дьыл туругун билсиҥ.
Илин эҥэр улуустарга бу бээтинсэҕэ уонна субуотаҕа (алтынньы 23-24 күннэригэр) түүнүн -5, -6, күнүһүн -1, -2 кыраадыс буолар, сэрэдэҕэ хаардыыр, бээтинсэҕэ сигирээн уонна субуотаҕа хаардаах.
Киин улуустарга түүҥҥү өттүгэр — 4, -5, күнүһүн +1, 0 кыраадыс, алтынньы 19-22 күннэригэр хаардаах, быыһыгар сигирээн.
Бүлүү бөлөххө түүнүн -3, -4 , күнүһүн -1, 0 буолуоҕа, оптуорунньуктан чэппиэргэ диэри хаардаах ардах, субуотаҕа эмиэ.
Соҕуруулуу-арҕаа улуустарга алтынньы 23-24 чыыһылаларыгар түүнүн -1, -2, күнүһүн +1, +2 кыраадыс күүтүллэр, чэппиэргэ диэри уонна субуотаҕа сигирээн.
Өймөкөөҥҥө түүн -15, -16 кыраадыска тиийэ намтыа, күнүһүн -8, -9, хаара суох.
Дьааҥы эҥэр улуустарга түүнүн -12, -13 диэри тымныйар, күнүһүн -8, -9 буолар, сэрэдэҕэ уонна бээтинсэҕэ хаардыыр.
Халыма, Индигиир улуустарыгар түүнүн -13, -14, күнүһүн -8, -9 буолара сабаҕаланар. Арҕаа арктика улуустарыгар бээтинсэҕэ, субуотаҕа түүҥҥү өттүгэр -6, -7 кыраадыс, күнүһүн -5, -6 кыраадыс күүтүллэр, улахан сөҥүү суох.
Алтынньы 21 күнүгэр 4 бааллаах, 22 күнүгэр 5 бааллаах күн эстиилэрэ көстөллөр.
«Бу кэмҥэ сэрэнэн сылдьыҥ, ордук суоппардар, айанныыр дьон болҕомтолоох буолуҥ», — диэн бэлиэтиир Тускул.
Өссө ааҕыҥ:
Сэтинньи уонна ахсынньы ыйдар сылаас туруохтара: Тускул тугу билгэлиир?
Читайте нас в:
