Тимир ууһа, ойууһут, бөлүһүөк, ытык киһибит, Саха Өрөспүүбүлүкэтин норуотун маастара, Саха Өрөспүүбүлүкэтин култууратын үтүөлээх үлэһитэ, П.А. Ойуунускай аатынан судаарыстыбаннай бириэмийэ лауреата, Анемподист Софронов-Алампа аатынан общественнай бириэмийэ лауреата, Российскай Федерация Духуобунаһын академиятын академига, үөрэхтээһин бочуоттаах үлэһитэ, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин, Таатта улууһун, Байаҕантай нэһилиэгин Бочуоттаах олохтооҕо, Саха норуотун духуобунай сирдьитэ Борис Неустроев – Мандар Уус алтынньы 20 күнүгэр 80 сааһын туолбута.
Бу күннэргэ ытык киһи Мандар Уус үбүлүөйдээх сааһыгар анаммыт араас хабааннаах тэрээһиннэр ыытылла тураллар. Ол чэрчитинэн, Үлэ Кыбартаалын уораҕайыгар кини утумнааччыларын кылаан үлэлэрин көрдөрөр «Моҕол ураһа төрүт сатабылларын кэрэһиттэрэ» диэн быыстапка үөрүүлээх аһыллыыта буолла.
Тэрээһин үөрүүлээх чааһыгар Саха Өрөспүүбүлүкэтин бырабыыталыстыбатын бэрэссэдээтэлэ Кирилл Бычков, солбуйааччыта Сергей Местников, СӨ култуураҕа уонна духуобунай сайдыыга миниистирэ Афанасий Ноев кыттыыны ыллылар.
Мандар Уус үлэтин утумнааччыларын, айылҕаттан айдарыылаах норуот маастардарын, Уус-Алдан сатабыллаах иистэрин, Туймаада ураты дьоҕурдаахтарын, Эҥсиэли хочотун уран тарбахтаахтарын кылаан үлэлэрэ, өрөспүүбүлүкэ айар талааннаах маастардарын оҥоһуктара, уран тарбах сылааһынан оҥоһуллубут көрүөхтэн сөҕүмэр эгэлгэ оҥоһуктар талаан түһүлгэтин киэргэттилэр.
Читайте нас в:
