Мандар Уус мөссүөнэ кыайыыга сирдээбитэ

Скульптор Василий Яковлевич Сивцев-Отур Силис Россия Худуоһунньуктарын сойууһун чилиэнэ, Петровскайдааҕы Наука уонна искусство академиятын чилиэн-корреспондена, Красноярскай кыраай үтүөлээх худуоһунньуга, Саха Өрөспүүбүлүкэтин искусстволарын үтүөлээх диэйэтэлэ. Кини араас таһымнаах үгүс быыстапкалар кыттыылааҕа, кыайыылааҕа.

Кини Красноярскайдааҕы художественнай институту бүтэриэҕиттэн түөрт уонча сыл Красноярскай куоракка олохсуйан олордор да, кини айар үлэтэ төрөөбүт Сахатын сиригэр ананар. Кини үлэлэрин Таатта, Томпо, Амма, Мэҥэ-Хаҥалас улуустарыгар, Дьокуускай куоракка көрүөххэ сөп. Улуу убайбыт Платон Алексеевич Ойуунускай үөскээбит Халымнаайытын үрдүгэр кини айымньытынан “Оҕо куйуурдуу турарын”, Уус Тааттаҕа суруйааччылар Николай Денисович уонна Анна Денисовна Неустроевтар пааматынньыктарын, Хадаайытааҕы литературнай-художественнай музейга саха дэгиттэр талааннаах классик суруйааччыта, общественнай-политическэй диэйэтэл Анемподист Иванович Софронов, саха норуодунай суруйааччыта, Социалистическай үлэ Дьоруойа, бу музейы тэрийбит Дмитрий Кононович Сивцев-Суорун Омоллоон пааматынньыгын, Аммаҕа академик Леонид Васильевич Киренскэй, талааннаах ырыаһыт Христофор Максимов пааматынньыктарын, Томпо Кириэс Халдьаайытыгар суруйааччы Анастасия Саввична Сыромятникова мөссүөнүн, Дьоруой ийэ Анна Николаевна Охлопкова бюһун, Дьокуускайга Аҕа дойду сэриитин сиэртибэлэригэр аналлаах “Суоруна” пааматынньыгы – скульптор үлэлэрин көрүөххэ сөп. Степной Думаны төрүттээбит Иван Емельянович Мигалкин, сахаттан бастакы быраас Прокопий Нестерович Сокольников, сахаттан бастакы академик Владимир Петрович Ларионов, культура бөдөҥ диэйэтэлэ Василий Афанасьевич Босиков уонна саха дьахталларыттан бастакы академик Мария Кузьминична Гаврилова бюстарын эмиэ Отур Силис оҥорбута. “Уол уонна оҕус” “Дьүөгэлиилэр”, “Олоҥхоһут мэтириэтэ”, “Сир оҕото”, “Аня”, “ Уол. Сайын”, “Туйаара” о.д.а. композициялар автора.

Отур Силис биһиги кэммитинээҕи интеллигенция баар суох талааннаах бэлиэ дьонун — опера ырыаһыта, аатырбыт бас Иван Прокопьевич Степанов, драма чаҕылхай талааннаах артыыһа Ефим Николаевич Степанов, саха аһын-үөлүн аан дойдуга таһаарбыт ааттаах асчыт Иннокентий Иннокентьевич Тарбахов уонна бу күннэргэ 80 сааһын туолбут аатырбыт ойууһут, дэгиттэр талааннаах уус, бөлөһүөк Борис Федорович Неустроев-Мандар Уус бюстарын оҥорбута.

Мандар Уус мөссүөнүн айыыга үлэтин скульптор маннык кэпсээтэ:

— Мандар Уустуун 2003 сыллаахха билсиhэн турабын… Ити улуу убайбыт Платон Алексеевич Ойуунускай үбүлүөйдээх сылын иннинэ ыам ыйыгар Тааттаҕа Былатыан Ойуунускай олорбут-үлэлээбит сирдэринэн уонча киhи буолан икки-үс хонук сылдьыбыппыт, ол кэнниттэн П.А. Ойуунускай айымньытынан “Оҕо куйуурдуу турара” үлэни онорбутум, ити Халымнаайыга уонна кини аатын сүгэр Саха театрыгар турар..! Бөлөххө Попов Николай Ефимович, Протодьяконов Михаил Александрович, Власов Виталий Гаврильевич, норуот маастардара Борис Федорович Неустроев-Мандар Уус, Эрнест Александрович Алексеев, Федор Чээрин уо.д.а. бааллара… Онно барыларын кытары саҥа билсибитим!

Айар этюды 2019 сыллаахха Баайаҕаҕа эрдэттэн Мандар Уустуун телефонунан кэпсэтэн, көҥүл ылан, болдьоһон эдьиийбинээн Жерготова Изабелла Яковлевналыын (Чөркөөх музейыгар дириэктэринэн үлэлээбитэ) икки хонукка баччаларга бара сылдьыбыппыт.

Мандар Уус бэйэтин үтүө майгытын курдук, үлэм чэпчэкитик уонна түргэнник тахсыбыта!

Биир күн иhигэр онорбутум — туойунан сыбаан уонна форма гипсэнэн устубутум… Манна Красноярскайга мастарыскыайбар иккитэ кутан таһаарбытым. Бастакытын Борис Федоровичка 75 сааhыгар Баайаҕаҕа Кыhа музейыгар бэлэхтээбитим!