Бүгүн, алтынньы 24 күнүгэр, «Чолбон» сурунаал редакцията уонна П.А.Ойуунускай аатынан Литература судаарыстыбаннай музейа «„ЧОЛБОН” АЙАР КЫҺАТА» диэн кыттыгас саҥа бырайыактара үлэтин саҕалаата.
Бу бырайыак сурунаал ааптардарын, проза жанрыгар суруйар 12 киһини түмэр. Кинилэр кылгас болдьох иһигэр Дьокуускай куорат уонна Саҥа дьыл тиэмэтигэр кэпсээннэрин суруйан ыыттылар. Сүүмэри ааспыт 7 киһи — Анатолий Слепцов, Петр Самсонов-Бүөтүр Хара, Валерий Андросов, Татьяна Поскачина, Сардаана Корякина, Роман Попов, Федор Павлов иккис түһүмэххэ тахсан, бу күн Литература музейыгар төгүрүк остуол тула олорон, эрэдээксийэ үлэһиттэрин кытта айымньылары ырытыстылар. Тааттаҕа олорор Бүөтүр Хара, Татьяна Поскачина уонна Федор Павлов куйаар ситимин нөҥүө кыһа үлэтигэр кыттыстылар.
Бу 7 кэпсээн ырытыллан, чочуллан «Чолбон» сурунаал ахсынньытааҕы нүөмэригэр бэчээттэниэхтэрэ. Айымньылар «Улус.Медиа» портал уонна А.Д.Макарова аатынан Саха сиринээҕи культура уонна искусство колледжын устудьуоннарын көмөтүнэн Саҥа дьылы көрсө тэттик уус-уран киинэлэр буолан тахсыахтара.
Айар тэрилтэлэр кыттыгас бырайыактара саха литературатыгар уонна киинэтигэр саҥа, сонун тыыны киллэриэхтэрэ.
Санатар буоллахха, бу бырайыак «Чолбон» сурунаал бас эрэдээктэрэ Гаврил Андросов, культура уонна искусство колледжын үлэһиттэрэ — киинэ оператора Иван Семенов, киинэ режиссера Александр Лукин, «Улус.Медиа» медиастудиятын салайааччыта Зинаида Григорьева сүбэлэһэннэр үөскээбитэ.
Тэрийээччилэр: Саха сиринээҕи культура уонна искусство колледжа, «Чолбон» сурунаал, «Улус.Медиа» портал, Кинематографистар ассоциациялара, «Сахафильм», Литература судаарыстыбаннай музейа, Саха театра, Үүнэр көлүөнэ театра.
Читайте нас в:
