“УОТ” медиакиин эдкоррдара 2-с Малдьаҕар нэһилиэгин баһылыгын Александр Алексеевы кытта көрсөн олох-дьаһах, кыстыкка киирии, үлэ-хамнас туһунан кэпсэттилэр, диэн «Кэскил» хаһыат суруйар.
- Александр Степанович, кыстыкка бэлэмнэнии биһиги нэһилиэкпитигэр хайдах бара турарый?
- Үтүө күнүнэн! Малдьаҕар 2-с нэһилиэгэ кыстыкка бириэмэтигэр киирдэ. Билигин саамай сүрүнэ – балаҕан ыйын 15 күнүттэн хочуолунайдарбыт оттулла тураллар. Ону таһынан нэһилиэк олохтоохторо сүөһү, от боппуруоһун быһааран, үлэлээн-хамсаан кыстыкка киирэргэ бэлэм олороллор.
- Быйыл от үүнүүтэ хайдаҕый, олохтоохтор кыстыыр отторун ыллылар дуо? Быйыл ардахтаах дьылынан сибээстээн ууга барбыт сирдээх дьон отторун-мастарын бэлэмэ хайдаҕый?
- От былаана 86% буолла, барыта 5784 туоннаны оттоотубут. Сенаж быйыл 1243 туоннаны ыллыбыт, сиилэс 2429 туонна. Өрөспүүбүлүкэтээҕи «Кормопроизводство» бырагырааманан сылын аайы биһиги нэһилиэкпит хаһаайыстыбалара: “Бөртө” сылгы иитэр собуота уонна Павлов Михаил Васильевич бааһынай хаһаайыстыбата граҥҥа тиксэннэр күрүө тутуннулар, тиэхиньикэлэрин саҥардан, сиилэс дьааматын оҥоһуннулар, бааһыналарын сөргүттүлэр. Бу бырагыраамаҕа киирсэллэригэр сылын аайы нэһилиэк бүддьүөтүттэн 500 тыһыынча солкуобай көрүллэр. Улахан хаһаайыстыбаларга саҥа механизированнай хотоннору тутуу үлэтэ ыытылынна.
- Билиҥҥи туругунан, нэһилиэнньэбит ахсаана төһөнүй?
- Нэһилиэнньэ уопсай ахсаана, статистика көрдөрүүтүнэн, 1360 киһи, онтон 1200 киһи олохтоохтук олоробут. Онтон дьахтара — 593, эр киһитэ – 639 киһи. 18 дылы саастаах оҕо ахсаана – 362. 63 оҕобут устудьуон.
- Биһиги нэһилиэккэ ыччат төһө олохсуйарый? Саҥа дьиэлэр тутууларын туһунан кэпсиэҥ дуо?
- 2024 сылга «Бөртө» сылгы собуотун үлэһиттэрэ олорор уопсай дьиэлэрэ киирбитэ — 4 саҥа кыбартыыра. Онон, чуолаан, тыа хаһаайыстыбатын испэсэлиистэрэ олорор дьиэлэрэ элбээтэ. Маны тэҥэ СӨ Үлэҕэ уонна социальнай сайдыыга министиэристибэтиттэн 25 ыалбытыгар дьиэлэригэр гаас тартарыытыгар ороскуоттаабыт үптэрин субсидия быһыытынан төнүннэриигэ үлэлэстибит. Улахан Ааҥҥа саҥа дьиэлэр тутуллаллар, дьон олохсуйуута элбээн иһэр.
- Александр Степанович, кэпсээниҥ иһин махтанабыт!
Богдан Слепцов, М.Е. Васильева аатынан 2-с Малдьаҕар орто оскуолатын 8 кылааһын үөрэнээччитэ, “УОТ” медиакиин.
Читайте нас в:
