Алтынньы 8 күнүгэр Бэчээт дьиэтигэр «Чолбон сурунаал доҕотторун ыҥырар» литература дьаарбаҥката буолла. Тэрээһин чэрчитинэн Россия суруйааччыларын сойууһун чилиэнэ, прозаик Константин Эверстов «Сэргэлээххэ сэргэх күннэр» диэн «Чолбон» сурунаалга бэчээттэммит саҥа сэһэнин геройдарын кытта көрсүһүү буолла. Бу түһүмэҕи П.А. Ойуунускай аатынан Литература музейын дириэктэрэ Рустам Каженкин ыытта.
Сэһэҥҥэ ааптар 90-с сыллардааҕы уларыйыылар, ыччат патриоттуу тыына уһуктуутун туһунан тус бэйэтэ көрбүтүн, истибитин үөлээннэхтэрин ахтыыларыгар олоҕуран суруйбут. Ыраах Кэбээйи Чагдатыгар олорор Константин Эверстов куйаар ситимин нөҥүө көрсүһүүгэ кыттан:
«90-с сылларга ыарахан кэмнэр турбуттара. Үлэ суох, хамнас кэлбэт, уулуссаҕа криминал, милииссийэҕэ ким да эрэммэт, сарсын хайдах күн буолара биллибэт ыһыллыы-тоҕуллуу кэмэ этэ… Оччолорго комсомол эстэн, кини оннугар эдэр ыччаты түмэр саҥа түмсүү ирдэммитэ… Саха ыччата өрөспүүбүлүкэ инники дьылҕатыгар сүрэҕинэн-быарынан күүскэ ыалдьарын бу сэһэҥҥэ хайдах баарынан ааҕыаххытын сөп».
Айымньы геройдара бу тэрээһиҥҥэ кэлэн оччотооҕу быһыыны-майгыны сиһилии кэпсээтилэр. Александр Жураковскай, университет ОКОД этэрээтин уонна «Эдэр саас» ассоциацияны тэрийээччи, билигин предприниматель уонна уопсастыбанньык:
«Бу 90-с сыллар, кырдьык, ыарахан сыллар этэ. Ол гынан баран Сахабыт Өрөспүүбүлүкэтэ, саха омуга чулуу уолаттарын, кыргыттарын көмөтүнэн атаҕар турбута. Биһиги, устудьуоннар, күүстээх түмсүүлээх этибит. Михаил Ефимович Николаевы өйөөн ыкса үлэлээбиппит. Ыччат үлэ биржатын, университет ОКОД этэрээтин, «Эдэр саас» ассоциациятын тэрийбиппит».
Майя Власьева, ааптардыын университекка бииргэ үөрэммит, билигин Олоҥхо тыйаатырын литературнай-драматическай чааһын сэбиэдиссэйэ:
«Мин Эверстов Константинныын бииргэ үөрэммитим. Онон оччотооҕу кэм устудьуоннарын көрүдьүөстээх кэмнэрин, олохторун, кинилэр кыһалҕаларын бу айымньыттан кэрэхсээн аахтым, чугастык ылынным. Бу биһиги аттыбытыгар олорор уолаттар оччотооҕу кэм саамай чаҕылхай уолаттара этэ».
Александр Григорьев билигин СӨ кикбоксиҥҥа Федерациятын президенэ, РФ үтүөлээх тренерэ:
«Урукку устудьуоннуур кэммитин санаатахха, Сэбиэскэй Сойуус эстибитин кэннэ Саха сиригэр эмиэ ыһыллыы-тоҕуллуу барбыта, олох тосту уларыйбыта. Ол кэмҥэ ыччат политикаҕа да, криминалга да кыттыһан барбыта. Маннык түгэҥҥэ хайдах буолабыт диэн санааттан сиэттэрэн университет иһигэр ыччаты түмэн, бэрээдэк олохтоон барбыппыт».
Кинилэртэн ураты «Сэргэлээххэ сэдэх күннэр» сэһэн геройдара предприниматель Сайдам Михайлов, Дьокуускай куорат Октябрьскай уокуругун баһылыга Валентин Эверстов, уопсастыбанньык Поликарп Андросов, предприниматель уонна спортсмен Александр Румин, 90-с сыллардааҕы «Эдэр саас» ассоциация президенэ, СӨ медицина булгуччулаах страховкатын олохтоох фондатын тутаах үлэһитэ Альберт Соров оччотооҕу кэм уонна айымньы туһунан бэйэлэрин санааларын кэлэн үллэһиннилэр.
Константин Эверстов бу айымньытын геройдарын ахтыыларын «Чолбон» сурунаал ахсынньытааҕы нүөмэригэр сиһилии ааҕыаххыт.
Анастасия Еремеева
Владимир Григорьев хаартыскаҕа түһэриитэ.
Также читайте:
Журнал «Чолбон» провел литературную ярмарку в Якутске
Читайте нас в:
