СӨ Судаарыстыбаннаһын күнүн көрсө Ил Дархан Айсен Николаев РФ уонна СӨ судаарыстыбаннай наҕараадаларын үөрүүлээх быһыыга-майгыга туттартаабыта. Онно Горнай улууһуттан Анал байыаннай дьайыы кыттыылааҕар, Суворов аатынан мэтээллээх Александр Федоровка «За отвагу» диэн бойобуой мэтээли туттарда. Бу туһунан «Үлэ күүһэ» хаһыат кэпсиир.
Санатар буоллахха, 2024 с. Александр Федоров взвода Донецкайга Нью-Йорк бөһүөлэгэр бойобуой сорудахха сылдьан, штурмҥа түбэһэн 17 күн подвалга сытарга күһэллибиттэрэ.
Хайаан да тыыннаах хаалан, взводун төгүрүйүүттэн таһаарар сыалтан Шурик эчэйбит атаҕын бэйэтэ быстарга кытаанах санааны ылыммыта. Взвод хамандыыра төһө да уустук балаһыанньаҕа сыттар, хамандыыр сорудаҕын итинник хорсуннук уонна чиэстээхтик толорбута.
Соторутааҕыта Александр үөрүүтүн үллэстээри уонна билигин хайдах олорорун куйаар ситиминэн билсэ сырыттыбыт:
— Шурик, дорообо! Бастатан туран, үрдүк наҕараадаҕынан эҕэрдэлиибин! Туох сонуннааххыный, доруобуйаҥ туруга хайдаҕый?
— Махтал, Нина! Билигин куоракка олоробун, дьиэ куортамнаан. Биллэн турар, ис туругум мөлтөөбүтэ биллэр. Эмтэниини бара сылдьабын. Атаҕым протеһын үчүгэйдик өрөмүөннэтиэм.
Былаан, үлэ элбэх. Бастатан туран, дойдубар Бэс Күөлгэ тахсан дьиэбэр кыра өрөмүөннэрбин ситэриэм. Сылгыларбын көрүөм-истиэм.
Онтон соҕуруу Донецкайга байыаннай чааспар баран кэлиэм. Бойобуой доҕотторбун көрсүөм, санаам-оноом син биир онно сытар…
— Инникитин туох былааннааххыный?
— Билигин АГАТУ-га үөрэнэ сылдьабын, агроном идэтигэр. Тыа киһитэ буоллаҕым төрүт дьарыкпын, сылгыларбын, элбэтэр былааннаахпын. Сылгыны тутарга, иитэргэ усулуобуйам баар — сирдээхпин, тиэхиньикэлээхпин.
Биир сүрүн соругум доруобуйабын чөлүгэр түһэрии. Үөрэхпин бүтэрэн, үлэ булан үлэлиэм.
Бу улахан наҕараада миэхэ сүҥкэн чиэс, улахан эппиэтинэс буолар. Олоххо көрүүбүн-истиибин өссө үрдэттэ. Эйэлээх олох туһугар үтүө кылааппын киллэрсэргэ бэлэммин. Дойдубут, дьоммут-сэргэбит нус-хас олоҕун туһугар мэлдьи бэлэм, бигэ тирэхтээх буолуоҕуҥ.
— Александр, истиҥ сырдатыыгар махтанабын! Сырдык баҕа санааларыҥ туола турдуннар. Этэҥҥэ буолууну баҕарабын.
Кэпсэттэ Нина Сутакова
Хаартыскалар дьоруой ВК канаалыттан, кини көҥүлүнэн ылылынна
Читайте нас в:
