Бүгүн, балаҕан ыйын 12 күнүгэр, «Уһун уонна көхтөөх олох» национальнай бырайыак чэрчитинэн Хатыҥ Арыы нэһилиэгин Граф Биэрэгин сэлиэнньэтигэр саҥа, бары өттүнэн усулуобуйалаах, медицинскэй тэрилинэн, миэбэлинэн толору хааччыллыбыт биэлсэр-акушер пуунун үөрүүлээх быһыыга-майгыга астылар. Бу туһунан «Эҥсиэли» хаһыат суруйар.
Үөрүүлээх тэрээһиҥҥэ СӨ доруобуйа харыстабылын министрин э.т. Дмитрий Сергин, Нам улууһун баһылыга Юрий Слепцов, «Хатыҥ Арыы нэһилиэгэ» ТСТ баһылыга Иван Ноговицын, Намнааҕы киин балыыһа кылаабынай бырааһа Ариан Сергеев, «Стройуниверсал» ХЭТ соучредителэ Константин Иванов, балыыһа коллектива, олохтоохтор кыттыыны ыллылар.
Юрий Слепцов, Нам улууһун баһылыга: «Киһи олоҕор саамай сүрүнэ — доруобуйа буолар. Граф Биэрэгин олохтоохторун доруобуйаларын көрөр-истэр сыаллаах доруобуйа харыстабылын министерствота бу саҥа объегы тутта. Ааспыт сылга халаан уута улахан урусхаллары оҥорон хорумньуну таһаарбыта. Куортамнаан турбут ФАП дьиэтэ эмиэ ууга барбыта. Правительство, министерство таһымыгар быһаарыныы ылыллан, Граф Биэрэгэр биэлсэр-акушер пуунун уонна Маймаҕаҕа биэлсэр пуунун тутууга үлэ саҕаламмыта. Халаан уутун кэнниттэн урукку тутуулары чөлүгэр түһэрии буолбакка, саҥа объегы тутууга биир бастакынан үлэни ыыппыттарыгар махталбын тиэрдэбин».
Дмитрий Сергин, СӨ доруобуйа харыстабылын министрин э.т.:
«Бүгүн биһиэхэ үөрүүлээх күн тосхойдо. Олохтоохтор саҥа биэлсэр-акушер пууннанан олуһун үөрдүбүт. Саҥа дьиэ тутуутун өр кэтэспиппит, бас билэр диэтэ-уота суох этибит. Олохтоохтор ааттарыттан улууспут, нэһилиэкпит дьаһалталарыгар, киин балыыһа коллективыгар, үрдүкү салалталарбытыгар махталбын тиэрдэбин. Биир дойдулаахтарын хаһан да ыалдьыбатыннар, чөл, чэгиэн туруктаах буоллуннар», — диэн Граф Биэрэгин олохтооҕо Татьяна Сметанина санаатын үллэһиннэ.
Биэлсэр-акушер пуунун сэбиэдиссэйинэн уонна биэлсэринэн Уйгун Беленков үлэлиэҕэ. «Уһун уонна көхтөөх олох» национальнай бырайыак олоххо киллэриллэн, нэһилиэнньэ чөл олоҕу тутуһар уонна доруобуйаны бөҕөргөтөргө баҕата улаатар.
Семен Аргунов
Читайте нас в:
