Өрөспүүбүкэ баһылыга Айсен Николаев тыа сиригэр тутуллар баараҕай култуура кииннэрэ хайысхаларын туһунан «Саха» НКИХ «Ил Дарханныын кэпсэтии» биэриитигэр санаатын эттэ.
«Урукку да, билиҥҥи да үйэҕэ норуот бэйэтин култууратын харыстаабатаҕына, сайыннарбатаҕына өрө тахсыбат, кэскилэ олохтоммот. Бу уустук кэмҥэ дьон өйдөөбөт түгэннэрдээх, үбү-харчыны култуура тэрээһиннэригэр, тутууларыгар ыыталлар дииллэр. Мин ону сыыһа саныыллар диибин. Оннооҕор сэрии кэмигэр, 1942 сыллаахха, Дьокуускайга киин киинэ тыйаатыра тутуллан үлэҕэ киирбитэ. Дойду бэрэсидьиэнэ култуура эйгэтин сайыннарыыга үлэ ыытар, дойду үрдүнэн бу политиканы өйүүллэр», – диэн Ил Дархан эттэ.
Айсен Николаев холобур быһыытынан Мэҥэ Хаҥалас Аллараа Бэстээх бөһүөлэгэр В.В. Местников аатынан култуурунай сайдыы киинин үлэтин кэпсээтэ.
«Урут судургутук Култуура киинэ диир буоллахпытына, билигин Култуура сайдыытын киинэ диэн буолар. Холобур, Аллараа Бэстээх бөһүөлэгэр култуурунай сайдыы киинигэр киинэ тыйаатыра, кэнсиэртиир саала, репетициялыыр устуудьуйалар бааллар. Дьон бу кииҥҥэ кэлэн өйдүүн-санаалыын сынньанар, айар иэйииттэн ис туругун толорор. “Культура” национальнай бырайыак баар буолан маннык баараҕай, дьон-сэргэ сайдарыгар туһуламмыт эбийиэктэр олоххо киирэллэр», – диэн санаатын үллэһиннэ Ил Дархан.
Санатан эттэххэ, “Культура” национальнай бырайыак быйылгыттан «Дьиэ кэргэн» («Семья») нацбырайыакка киирсэр.
Хаартыска ЯСИА
Читайте нас в:
