Бүгүҥҥү «Ил Дарханныын кэпсэтии» быһа биэриигэ Өрөспүүбүлүкэ Баһылыга Айсен Николаев тутулла турар Арктика култууратын киинин тула бэйэтин санаатын эттэ.
Ол курдук: «Билиҥҥи үйэҕэ хас биирдии дойду маннык култуура кииннээх буолуохтаах. Бэйэбитигэр кииннээх буоллахпытына, оччоҕо атын сиртэн артыыстар бэйэлэрин кэлэн көрдөрөллөрө, биһиги дьоммут хардары ситиһиилэрин, талааннарын үллэстэллэрэ — олус үчүгэй. Үрдүкү муусука оскуолатын бүтэрбит оҕолорбут атын дойдуларга, бэл, тас дойдуларга тиийэн үлэлии сылдьаллар. Тоҕо? Биир төрүөтэ кинилэргэ үлэлииллэригэр сөптөөх үрдүкү кылаастаах Филармония саалата суоҕуттан. Ол иһин тутулла турар Арктика култууратын киинэ үлэҕэ киирдэҕинэ, бэйэбит ыччаппытын дойдубутугар хаалларан, кинилэри үлэлэтэргэ, эбии сайыннарарга улахан кыах биэриэҕэ. Манан сиэттэрэн, Сахабыт төрүт култуурата Аан дойду таһымыгар тахсыахтаах», — диэн Айсен Сергеевич тоһоҕолоон эттэ.
Уопсайа 33 тыһ. кв.м. иэннээх уонна 36,7 м үрдүктээх эбийиэк олоххо киирдэҕинэ, Саха Академическай театра, Олоҥхо театра, Филармония, бэлэмнэнэр, мультимедийнэй, сиэри-туому толорор саалалар, трансформер саала о. д. култуура тэрилтэлэрэ биир сиргэ түмүллэн дьиэлэниэхтэрэ. Барыта 1530 киһи киирэн олорор миэстэлээх буолуо диэн этиллэр. Кырыыһатыгар амфитыйаатыр, дьон-сэргэ көрөр былаһаакката баар буолуохтаахтар.
Итиэннэ, туристары угуйар, дьон сынньалаҥын туһалаахтык атаарарыгар табыгастаах сир буоларын таһынан, бу маннык далааһыннаахтык үлэлиир Киин саха норуотун төрүт үгэһин, култуурунай нэһилиэстибэтин харыстыырга, кэлэр көлүөнэлэргэ этэҥҥэ тиэрдэргэ улахан төһүү буолуохтаах.
Читайте нас в:
