Чурапчы улууһун дьаһалтата уонна улуус депутаттарын Сэбиэтэ байыаннай дьайыы кыттыылаахтарыгар уонна кинилэр дьиэ кэргэттэригэр, чугас дьонноругар көмө быһыытынан сир учаастактарын түҥэтэр туһунан быһаарыныы ылыммыта. Бу туһунан «Саҥа олох» хаһыат суруйар.
Ол быһыытынан бүгүн Чурапчы нэһилиэгэр «Кыттайбаҥҥа» 141 сир учаастагын үллэриигэ «колышкалары» туруоруу саҕаланна. Бу күннэргэ улуус бас билэр баайын-дуолун салайар комитет (КУМИ) сир учаастактарын тыыран, маһынан бэлиэлэри туруортаан бүтэриэхтээх.
Улууска байыаннай дьайыы кыттыылаахтарыгар, кинилэр дьиэ кэргэттэригэр уонна чугас дьонноругар улуус баһылыгын дьаһалынан уонна волонтерскай хамсааһынынан көмө, өйөбүл бу курдук салгыы оҥоһулла туруо.
Бу бэриллэр саҥа сирдэргэ суол-иис тутуутугар, гаас, уот ситимнэрэ тардыллыыларыгар тиһиктээх үлэлэр былааннаммыттара. Учаастак ылбыт ыаллар мантан ыла дьиэ туттан саҕалыахтара.
“Чурапчы улууһа” МТ баайын-дуолун салайар комитет сүрүннээһининэн ыытыллыбыт үлэ түмүгэр, бу түҥэтиллиэхтээх сирдэр бары кадастровай нүөмэрдээхтэр уонна уһаайба аайы бэлиэ мастар (колышкалар) анньыллаллар. Бу күннэргэ сир ылбыт дьоҥҥо уһаайбаларын ыйан-көрдөрөн биэриэхтэрэ.
Читайте нас в:
