Бүгүн, бэс ыйын 12 күнүгэр, С.А.Зверев-Кыыл Уола аатын сүгэр Саха Өрөспүүбүлүкэтин үҥкүүтүн тыйаатырын балетнай саалатыгар «Кынчарҕаннаах харахтаах, кырыылаах сутуруктаах Кыыс Кыыдаан Бухатыыр» испэктээк туруорулунна.
Ураты көрүүлээх, дириҥ толкуйдаах режиссер Сергей Потапов испэктээгэр үгүс сэҥээрээччи тоҕуоруһа муһунна.
Испэктээк тойуктарын тылын ааптара Саха норуодунай бэйиэтэ Наталья Михалёва-Сайа буолар. Көрүү кэнниттэн көрөөччүлэр бэйэ икки ардыгар санааларын үллэһиннилэр.
Режиссер Сергей Потапов:
— Бу испэктээк Кыыс Кыыдаан диэн ааттаах саха бухатыырын туһунан. Кини бу Орто дойдуну көмүскүүр. Кини Орто дойдуну киртитимээри Аллараа дойдуга абааһы буолан киирэн өлөрөр. Эмиэ дьикти өй-санаа диэххэ сөп. Абааһылары кыратык да киһититэ сатаатыбыт. Абааһылар даҕаны бэйэлэрэ эмиэ баҕалаахтар уонна өйдүүр өйдөөхтөр, нууччалыы эттэххэ, чувстволаахтар. Кинилэр эмиэ ытыыллар-соҥууллар, кинилэр эмиэ бэйэлэрэ кыдьыктаахтар. Биһиги эмиэ кыдьыктаахпыт. Онон олох барарын тухары үрүҥ уонна хара син биир кыргыһыыта, кыргыһа, ону ким да кыайар кыаҕа суох. Артыыстар олус кыһаллан оонньоотулар. Бу испэктээк үҥкүү тэтиминэн барда, онон-манан кырааскалаан биэрдибит: олоҥхо тылынан, тойугунан, сунтаардар тойуктарынан, итиэннэ «Кыл Саха» төрүт дорҕоон бөлөҕүн тыыннаах доҕуһуолунан. Хас биирдии улуус бэйэтэ туспа тойуктааҕынан биллэр. Итиэннэ бу испэктээк Сергей Зверев-Кыыл Уола төрөөбүтэ 125 сылыгар ананна. Мин бэйэм төрдүм Сунтаар, онон ытык иэспин төлөөтүм диэхпин сөп.
75 мүнүүтэлээх, ураты, хас биирдии көрөөччүнү толкуйдатар, ыраах, атын эйгэҕэ көтүтэн илдьэр испэктээк көрөөччү дохсун ытыс тыаһынан доҕуһуолланан түмүктэннэ.
Вилена Слепцова, Хотугу аҕыйах ахсааннаах норуот тыйаатырын артыыската:
— Мин бүгүн көрөөччү быһыытынан кэллим. Бастатан туран, киинэ курдук биир тыынынан көрдүм, артыыстар хамсаныынан испэктээк ис хоһоонун толору арыйдылар. Тус бэйэм абааһы оҕону былдьаабытыгар ытамньыйдым. Көстүүмнэрин наһаа сэргээтим. Сергей Потапов хас биирдии үлэтэ ураты, хатыламмат, көрөөччү атын хараҕын, көрүүтүн арыйар диэн түмүккэ кэллим.
Режиссер Сергей Потапов: «Күһүн, табылыннаҕына, бу испэктээгинэн Санкт-Петербург куорат улахан сыанатыгар оонньуохпут», — диэн инники былаанын үллэһиннэ.
Валентина Догоюсова, ааптар хаартыскаҕа түһэриилэрэ.
Ыспыраапка:
Либретто ааптара — Анна Аммосова, режиссёр — Сергей Потапов, үҥкүүнү туруордулар — Эдуард Жирков, Евдокия Софронеева. Худуоһунньук — Екатерина Шапошникова, тойуктар тылларын ааптара — Наталья Михалёва-Сайа.
«Кыл Саха» төрүт дорҕоон бөлөҕө — сал. Анна Томская.
Читайте нас в:
