2016 сыллаахха Рио-де-Жанейро куоракка ыытыллыбыт Олимпиада биир чаҕылхай сулуһа Сослан Рамонов Чурапчы улууһун А. Федотов аатынан успуорт уораҕайыгар үүнэн иһэр кэскиллээх тустууктарга маастар-кылаас ыытта. Бу туһунан «Сана олох» хаһыат сырдатар. 

Ити иннинэ, улуус баһылыгын 1-кы солбуйааччы Егор Сивцев, улуус дьокутааттарын Сэбиэтин бэрэссэдээтэлэ Афанасий Захаров бүгүҥҥү күн бочуоттаах ыалдьытын, Саха норуотуттан Олимпиада үрдүк чыпчаалыгар иитиллэн тахсыбыт бөҕөстөр сирдэригэр-уоттарыгар үктэммитинэн итиитик-истиҥник эҕэрдэлээтилэр уонна кыл сэлээппэни, дэйбиири, кылааннаах саха быһаҕын бэлэх ууннулар.

Үөрүүлээх чаас кэнниттэн, титуллаах бөҕөс уһуну-киэҥи этэ барбакка, эдэр тустууктары кытары сэрээккэҕэ киирдэ. Бэйэтин тула олордон эрэ көҥүл тустуу сорох албастарын көрдөрөн, хайдах таба туһаныахха сөбүн туһунан быһаарда, ханнык түгэҥҥэ сыыһалларын ыйаталаан сүбэ-ама биэрдэ. Эдэр тустууктар бэйэлэригэр туһааннаах ыйытыктары эмиэ биэртэлээтилэр.

Маастар-кылаас түмүктэниитэ Сослан Людвикович: “Бэйэҕитин хаһан даҕаны сэнэнимэҥ, харса суох иннигит диэки баран иһиҥ. Аҥардас успуордунан эрэ үлүһүйбэккэҕит, үөрэххитин эмиэ кытаатыҥ. Үөрэхтээх дьон буоллаххытына барытын ситиһиэххит, бэрээдэктээх буолуҥ, төрөппүттэргит тылларын истиҥ. Сөбүлүүр дьыалаҕытынан дьаныардаахтык дьарыктаныҥ. Чурапчыттан хайаан даҕаны Олимп хайатын дабайыаххыт”, — диэн бэйэтин улахан эрэлин биллэрдэ.

Уопсай хаартыскаҕа түһэн бараннар, Олимпийскай чөмпүйүөн илиититтэн автографтаах брошюралары туттулар. Уолаттар бука бары үөрэн-көтөн, сэргэхсийэн тарҕастылар. Бу маннык көрсүһүүлэр үүнэн иһэр бөҕөстөргө хайаатар даҕаны туһаны аҕалаллара саарбаҕа суох.

Сэмэн Жендринскэй. Ааптар хаартыскаҕа түһэриитэ