Амма улууһугар байыаннай эпэрээссийэҕэ кытта сылдьар биир дойдулаахтарбытыгар уонна кинилэр дьиэ кэргэттэригэр көмөлөһөр сыаллаах анал фонда тэриллэн үлэлиир. Фонданы улуус депутаттарын Сэбиэтин бэрэссэдээтэлэ Софья Александрова салайар.

«Анал фонда дьон-сэргэ баҕа өртүнэн биэрэр үптэригэр-харчыларыгар олоҕурар. Манна төһө харчы киирбитин, ханна туттуллубутун мин өссө тохсунньу ыйга улуус хаһыатыгар кэпсээбитим. Ол курдук холобура киирбит харчы анал эпэрээссийэҕэ сылдьар уолаттарбытыгар 30-туу тыһ. солк. көмө быһыытынан баран турар. Ону сэргэ наадалаах байыаннай тэриллэри ылыыга. Бу күннэргэ, ол эбэтэр хаһыат ыам ыйын 19 күнүнээҕи нүөмэригэр 2023 сылга киирэн баран муус устар ыйга диэри үп киириитин отчуота тахсыаҕа. Биһиги дириҥ махталбытын бары улууспут тэрилтэлэригэр, бэтэрээннэрбитигэр, күүс-көмө буолбут олохтоохторго тириэрдэбит. Ону сэргэ улахан көмөнү Ил Түмэн депутата Руслан Еремеевич Федотов оҥорор. Кини Фонда тэриллиэҕиттэн ыксаллаах балаһыанньаларга куруутун утары баран улахан көмөнү оҥордо, оҥоро да олорор. Маннык көмө Фонда урут Аҕа дойду улуу сэриитин кэмигэр эмиэ тэриллэн Кыайыы кэлиитигэр сүҥкэн кылаатын киллэрбитэ. Онон билигин эмиэ бу Фондаҕа киирэр харчы Кыайыы эмиэ түргэнник кэлэригэр, биир дойдулаахтарбыт этэҥҥэ эргиллэн кэлэллэригэр өйөбүл буоларын өйдүөх тустаахпыт.

Билигин биһиги уолаттарбыт 1941-1945 сылларга аҕаларбыт, эһэлэрбит Аҕа Дойду Улуу сэриитигэр көрдөрбүт хорсун быһыыларын, кинилэр үтүө ааттарын түһэн биэрбэккэ, кинилэр бойобуой суолларын утумнаан инники кирбиигэ хорсуннук сылдьаллар. Оттон биһиги, дойдубутугар хаалбыттар, тыылы хааччыйааччылар, туох баар өйбүтүн-санаабытын, кыахпытын-күүспүтүн барытын Кыайыы туһугар, фрону хааччыйыы туһугар, сэриигэ сылдьар саллааттарбыт тустарыгар аныырбыт – биһиги Ытык Иэспит. Оннук эрэ буоллаҕына, Арассыыйа норуоттара бука бары сомоҕолостохпутуна, норуот уонна армия биир буоллахпытына эрэ, Кыайыыны ситиһиэхпит! Биһиги уолаттарбытын кытта куруутун сибээһи тута олоробут. Кинилэр туох наадатын эттэхтэринэ ону толорорго дьулуһабыт. Онно бу Фондаҕа киирбит харчы барытыгар өйөбүл буолар. Онон өссө төгүл улууспут олохтоохторун бэйэҕит ис дууһаҕытынан көмөнү оҥороргутугар, тэрилтэлэр биирдии күннээх хамнаскытын аныыргытыгар баҕарабыт. Киирбит үп барыта отчуоттаныллан эһиги билиигитигэр улууспут хаһыатын нөҥүө тахса туруо”, — диэн билиһиннэрдэ Софья Лаврентьевна.

«Амма олоҕо»