Евдокия Ефимова хаартыскаҕа түһэриитэ

Сылгыны үөрдээн иитии – биһиги өрөспүүбүлүкэбит тыатын хаһаайыстыбатын биир сүрүн салаата. Ил Дархан Айсен Николаев тыа хаһаайыстыбатын сайыннарыы стратегическай хайысхаларыгар туһуламмыт Ыйааҕар 2024 сылга диэри 20 тыһ. төбөҕө суоттаммыт 200 типовой сылгы базата тутулларын бырабыыталыстыба хааччыйарыгар сорудахтаабыта.

Саха сирэ сылгытын ахсаанынан дойдуга бастакы миэстэҕэ сылдьар. Билигин бары киэптээх хаһаайыстыбаларга 189 378 төбө кыстыгы туораан эрэр. Быйыл тэрээһиннээх хаһаайыстыбаларга биэ төбөтүгэр көрүллэр көмө харчы 3 тыһ. солкуобайтан 5 тыһ. солкуобайга диэри үрдэтиллибитин таһынан сылгы базатын тутууга өрөспүүбүлүкэ 2023 сыллааҕы бүддьүөтүгэр 57 мөл. солкуобай угуллубута.

Субсидия ылыахтаах хаһаайыстыбалары Тыа хаһаайыстыбатын министиэристибэтин хамыыһыйата бу күннэргэ сүүмэрдээтэ. Хамыыһыйа көрүүтүгэр өрөспүүбүлүкэ 18 улууһуттан уонна Дьокуускай куораттан 73 сайаапка киирбит. Сүүмэрдээһин түмүгэр 54 хаһаайыстыба ирдэниллэр баалга хапсыбата, 19 хаһаайыстыба судаарыстыба өйөбүлүн ылыаҕа. Биир база тутуутугар көрүллэр ороскуот сорҕотун толуйууга бэриллэр көмө үп кээмэйэ – 3 мөл. солкуобай.

Кыайыылаахтар ортолоругар Хаҥалас улууһуттан “Бөртө сылгы собуота” ХЭУо уонна “Дьөһөгөй” ТХПК, Амма улууһуттан “Болугур” ТХПК уонна И.Я. Строд аатынан ТХПК, Чурапчы Одьулуунуттан “Комплекс” ХЭУо, Нам улууһуттан “Борохой” ТХПК, Өймөкөөнтөн “Силис Полюс Холода” ТХПК диэн элбэх сылгылаах хаһаайыстыбалар бааллар. Хоту Өймөкөөн улууһуттан 3, ол иһигэр Томтортон 2, хаһаайыстыба тигистэ. Нам улууһуттан Кыһыл Сыыртан өссө “Дайар” ТХПК киирдэ. Аммаҕа бааһынай хаһаайыстыбалаах Алексей Караканов уонна Хаҥалас бааһынайа Евгений Никифоров улуустарыттан 3, Чурапчы Дириҥин урбаанньыт-бааһынайа Иван Сергеев улууһуттан 2 ахсааны ситэрдилэр. Бүлүүттэн, Үөһээ Бүлүүттэн, Ленскэйтэн, Куорунайтан, Үөһээ Дьааҥыттан уонна Дьокуускай Сыырдааҕыттан 1-дии хаһаайыстыба хабыстылар.

Сүүмэрдиир хамыыһыйа бэрэссэдээтэлэ, тыа хаһаайыстыбатын миниистирин солбуйааччы Николай Афанасьев иһитиннэрэринэн, 2017 сылтан 2022 сылга диэри судаарыстыба өйөбүлүнэн 277 хаһаайыстыба туһаммыт. Өрөспүүбүлүкэ үрдүнэн 784 сылгы базата баар, хаһаайыстыбалар өссө 416 базаны туттарга баҕатыйаллар. Тэҥнэбилгэ эттэххэ, былырыын өрөспүүбүлүкэ бүддьүөтүттэн 54 мөл. солкуобай бэриллэн, 11 улууска 18 хаһаайыстыба саҥа база тутунна.

Василий Никифоров