Бу кэнниттэн тыйыс тымныы үөһүгэр, будулҕан буурҕа быыһыгар үөр табаны кэтээн көрөн ууһатан-үөскэтэр үгүс сыраларын биэрэр хоһуун табаһыттар күрэхтэстилэр. Маныаха 7-с ыстаада биригэдьиирэ Туприн Алексей Дмитриевич эр дьоҥҥо сыарҕалаах буурдарынан 10 км. сүүрдэн абсолютнайга кыайарын кыайан, улуус дьаһалтата туруорбут 1 мөлүйүөннээх бирииһин өрө көтөҕүллэн ылла. II -с миэстэни 4-с ыстаада табаһыта Туприн Василий Ануфриевич ылан 100.000 солк. наҕараадаланна, III-с миэстэҕэ 2 –с ыстаада биригэдьиирэ Попов Анатолий Валерианович ылан 70.000 солк. тиксэн үөрүүлэрэ үрдээтэ.

Салгыы дьахталларга 8 км. сыарҕалаах табанан сүүрдүүгэ 8-с ыстаада ыстаада чуум үлэһитэ Екатерина Туприна бастакынан сүүрдэн кэлэн Айхаллааҕы ХБК туруорбут буранынан үөрүү-көтүү ортотугар тутта. Салгыы II-с миэстэни 2-с ыстаада чуум үлэһитэ Анна Попова ылан 70.000 солк., III –c миэстэни 4-с ыстаадаттан Марианна Туприна ылан 50.000 солк. наҕараадаланнылар. Аны бэтэрээннэргэ 8 км. сыарҕалаах табанан сүүрдүүгэ Туприн Дмитрий Иванович тэҥнээҕин булбата, лодка мотуоругар тигистэ. II-с миэстэни Туприн Афанасий Спиридонович 70.000 солк., III-с миэстэлээх Валериан Николаевич Поповка 50.000 солк. сертификаттарын биэрдилэр.

Биир табанан 2 километрга диэри сүүрдүүгэ Иван Спиридонович Туприн кыайан болгарканан наҕараадаланна, аны табалаах хайыһарынан 1 километрга диэри буксировкаҕа Дмитрий Иванович Туприн кыайда. Оттон 35 сааһыгар диэри эдэр табаһыттар күрэхтэригэр Иннокентий Спиридонов бэйэтин сымсатын, кыаҕын көрдөрөн «Анаабыр алмаастара» тэрилтэ туруорбут буранынан наҕараадаланна. 35 сааһыттан 55 сааска диэри күрэххэ бастакы миэстэни 2-с ыстаада биригэдьиирэ Попов Анатолий Валерианович ылан улуус дьаһалтата туруорбут буранын үөрүүлээх быһыыга ылла. Маны сэргэ 5 килэмиэтиргэ сүүрдүүгэ бастакынан 1-кы ыстаада табаһыта Олег Спиридонович Туприн кыайда. Аны оскуола оҕолоругар уучаҕынан сүүрдүүгэ Кира Туприна кыайан мультиварканан, улахан саастаах оҕолорго Валериан Попов (эт эрийэр тэрилинэн) бастаатылар.

Табаһыттары чиэстээн-бочуоттаан спонсордаабыт, сыаналаах бириистэри туруорбут промышленнай тэрилтэлэр салайааччыларыгар, улуус дьаһалтатыгар, оройуон үлэһит коллективтарыгар махтал истиҥ тылларын олохтоохтор тиэрдэллэр. Маны сэргэ бу икки күннээх бырааһынньыкка «Сааскылаах-Үрүҥ Хайа» айан суолунан олохтоохтору, ыалдьыттары таспыт суоппардарга махталбытын этэбит.

Күндү көрөөччүлэргэ бырааһынньыктааҕы «Табаһыттар ыллыыллар» ырыа фестивалын, сарсыныгар көмүс куоластаах эстрада ырыаһыта Кылаан Кындыл, “Гулун” тыйаатыр имигэс тэтимнээх үҥкүүһүттэрэ «Долган» Арктикатааҕы хотугу норуоттар Культураларын уонна искусствотын дьиэтигэр дьоро киэһэни бэлэхтээтилэр. Маннык үтүө түгэҥҥэ СР норуотун уус-уран оҥоһуктарыгар маастара үрдүк ааты талааннаах иистэнньэҥҥэ Попова Прасковья Карповнаҕа ытыс дохсун тыаһыгар иҥэрдилэр.

Анаабыр эбэ хотун дьоллоох түбэтигэр, өргө диэри долган-эбэҥки ырыата ньиргийдэ, долгаан норуотун олоҕун түстүүр табаһыт хоһууннар, көс олохторун араҥаччылыыр аналлаах чуум үлэһиттэрэ өбүгэлэриттэн кэлбит күрэхтэргэ чаҕылхай көрдөрүүлэри ситиһэн, утумнааччылар баалларын итэҕэттилэр.

Гуннара Ороһуунускайа
Саргылаана Раева хаартыскалара