САХА СИРЭ. АНААБЫР УЛУУҺА. КУЛУН ТУТАР 27 КҮНЭ —  ULUS.MEDIA. Бу күннэргэ Арктика кытылыгар аан бастакынан, Анаабыр улууһун Сааскылааҕар, үрүттээх хаҥкылыыр сир баар буолла. Бу туһунан «Анаабыр уоттара» хаһыат иһитиннэрэр.

Улуус баһылыга Эдуард Платонов ыччаты чөл олохтоох, эт-хаан өттүнэн күүстээх, успуорка дьулуурдаах буолалларыгар туһаайан, Челябинскай собуотун кытта сөбүлэҥ түһэрсибитэ. Онон, ааспыт нэдиэлэҕэ улуус баһылыгын бастакы солбуйааччы Василий Поскачин Челябинскайтан командировкаҕа кэлбит ангарнай системалаах үрүттээх хаҥкылыыр сири таҥар специалистары Александр Колесовы, Сергей Бобровы кытта кэпсэппиттэрэ. Маныаха Сааскылаах нэһилиэгин дьаһалтата  эр дьону субботникка ыҥыран түмпүтэ.

Хата күммүт-дьылбыт бу икки күннээх өрөбүлгэ этэҥҥэ туран, нэһилиэк эр дьоно мустан, хойукка диэри таһаарыылаахтык үлэлээтилэр. Инники кэскиллэрбит — оҕолорбут мантан саас сиэттиспитинэн кэлэн хаҥкылыахтара, уолаттар хоккей оонньуохтара. Бастакы күн «Комуслуга» тэрилтэтин погрузчига сири дэхсилээбитэ, эр дьон түмсэн салгынынан үрүллүбүт манеһы хостоон ыланнар, анал аппаратынан үрдэрэн турар миэстэтин булларан көҥдөйүн таһаарбыттара. Салгыы күргүөмүнэн анал куулларга лаппаахынан кумахтары кутаннар, тирэхтэнэн турарыгар иһиттэн уонна таһыттан баттаттылар. Бу хоһууннартан түргэн туттууну, күүстээх эт-хаан былчыҥ үлэтин эрэйэр.

«Биһиги эһиги эр дьоҥҥут сымсаларыттан, түмсүүлээхтэриттэн  сөхтүбүт. Кинилэр көмөлөрүнэн бу каркаснай тэрилбитин сыччах биир күн эрэ иһигэр туруордубут. Атын сирдэргэ  үс күн иһигэр үрдэрэн оҥорооччубут. Уолаттар хара бастакыттан тугу эппиппитин  тута өйдөөн, үлэни-хамнаһы сарсыардаттан хойукка диэри тэрээһиннээхтик ыыттылар. Бу 560 миэтэрэлээх манеһы Челябинскай собуотугар бэйэтигэр оҥорон таһаарабыт, Арктика оройуонугар бастакынан эһиэхэ туруордубут. Аны күҥҥүт-дьылгыт олус түргэнник уларыйар эбит. Анаабыры олус  сөбүлээтибит, хайалардаах кыраһыабай айылҕалаах кэрэ дойдулаах эбиккит. Анаабыр өрүскүт эмиэ ураты уобараһы биэрдэ. Инникитин ыччаккытын спордунан күүскэ сайыннарыҥ, манна үрдүк таһымнаах күрэхтэри ыытан оройуоҥҥут аатын үрдэтиҥ, үп-харчы киллэриҥ, хаҥкылыыр сиргитин харыстааҥ үчүгэйдик көрө-истэ сылдьыҥ», — диэн Александр Колесов үөрбүт-сөхпүт санаатын үллэһиннэ.

Салгыы иккис күҥҥэ уотун-күөһүгэр светодиоднай светильниктары үс эр бэрдэ холбоору тэнитэллэр. Онтон таһырдьа уолаттар кууллары кумаҕынан толорон иһирдьэ эрчимнээхтик киллэрэн уураллар. Маныаха улуустааҕы «Комуслуги» МУТ салайааччыта Симон Петров бары бииргэ сүрүн туруоруутун үлэтигэр түмсэн көхтөөхтүк түмүктээн эрэллэрин, аны уу кутуута, атын ис-тас үлэтэ хаалбытын тэрээһиннээхтик ылсыахтарын эттэ. Манна эбии хоккей оонньуутун  тэриллэрин эбии ууруохтаахтар. Сотору кэминэн үлэтэ үмүрүйдэҕинэ, оскуола үөрэнээччилэрэ, эдэр ыччат кэлэн дьарыктанар, эрчиллэр, көрсүһэр сэргэх сирдэринэн буолуо. Бу курдук республикаҕа Үлэ уонна Сааскылаах нэһилиэгэр Аҕа сылын чэрчитинэн үтүөкэн аҕалар оҕолорун тустарыгар үтүө холобуру көрдөрдүлэр. Арассыыйа былааҕын үс өҥүнэн ойууламмыт саҥа хаҥкылыыр сир ыччаты өрүү кыайыыга сирдээтин !

 Гуннара Байгильдина