САХА СИРЭ. ДЬОКУУСКАЙ. КУЛУН ТУТАР 7 КҮНЭ — ULUS.MEDIA. Ааспыт үйэ бүтүүтүгэр, 90-с сылларга сайа охсон киирбит сэргэх уларыйыылартан биирдэстэринэн, бэчээт эйгэтигэр саҥа сурунааллар, хаһыаттар тэриллиилэрэ буолар. Олортон биирдэстэринэн өрөспүүбүлүкэ уопсастыбаннай олоҕор суолталаах таһаарыы “Далбар Хотун” сурунаал күн сирин көрбүтэ. Сурунаал отучча сыл устата тиһигин быспакка саха ыалын күүтүүлээх, сэргэх кэпсээннээх ыалдьыта буолан кэллэ.

Бу күннэргэ “Далбар Хотун” сурунаал Куйаар ситимигэр киирэн Dalbar.ru диэн аадырыһынан бэйэтин үлэтин саҕалаата. Аан дойду кэрэ аҥаардарын күнүн көрсө, кулун тутар 7 күнүгэр саайт үөрүүлээх арыллыыта, сүрэхтэниитэ буолан ааста. Манна сурунаал редколлегиятын саҥа чилиэттэрэ, суруналыыстар кыттыыны ыллылар.  Бас эрэдээктэр Зинаида Архипова сурунаал уонна саҥа саайт үлэтин-хамнаһын, инники былааннарын  туһунан сырдатта. Ону таһынан, «Сахабэчээт» АТ генеральнай дириэктэрэ Ньургуйаана Стручкова, саха норуодунай поэта Наталья Харлампьева сүбэ-соргу тылларын, баҕа санааларын эттилэр.

Dalbar.ru саайка сурунаалга тахсар сүрүн рубрикалары:“Ийэ тыл сүмэтэ”, “Далбар олбох”, “Айар кут”, “Чөмчөкө”, “Тойон сэргэ”,  “Тыа сирэ” уо.д.а. ааҕыаххытын сөп. Ону таһынан, дьон-сэргэ сөбүлээн ааҕар, туһанар “Сандалы”, “Сүһэн ыл”, “Хоппуйа: иис”, “Сир уоҕа”, “Алаһа”рубрикалар баай иллюстрациялаах тахса туруохтара. Маны сэргэ литератураҕа аналлаах “Биир кэпсээн”, “Хоһоон толооно”, дьахтар доруобуйатыгар сыһыаннаах “Чэгиэн”, “Ийэ муннуга”,  “Уйулҕа”, ону сэргэ “Сиэр-туом”,“Мэҥэ ааттар”, “Уус”, “Урбаан”, “Кэрэ сэбэрэ”, “Харах далана” уо.д.а. рубрикалар аттарыллан киирдилэр. Бу суруйууларга аныгы киһи сэҥээрэрин, сонуургуурун, биитэр мунаахсыйар ыйытыыларыгар хоруйдарын булан ааҕыан сөп.

Инникитин саайка “Далбар Хотун” сурунаал бастакы сыллардааҕы нүөмэрдэрэ архыып быһыытынан хомуллан киириэхтэрэ. Саайт сирэйигэр сылын аайы ыытыллар “Далбар Хотун” интерактивнай күрэһэ ыытыллыа. Ону таһынан ааҕааччы сурунаалга саайт нөҥүө суруйтарар кыахтаныа.

Сурунаал айар-тутар үлэһиттэрин кэккэтигэр бас эрэдээктэр, поэт, суруналыыс Зинаида Архипова, бас эрэдээктэри солбуйааччы, суруналыыс, фотограф Юлия Пестрякова, поэт, суруналыыс Ольга Корякина – Умсуура, саха норуодунай суруйааччыта Елена Слепцова – Куорсуннаах, эдэр  кэскиллээх суруналыыстар Венера Охлопкова, Анна Павлова күн ахсын сонун тылы сонордуу, үлэлии-хамсыы сылдьаллар.