Мэҥэ Хаҥалас улууһа. Олунньу 28 күнэ — ULUS.MEDIA. Мария Лукина салайааччылаах Майатааҕы “Түмэн” уопсастыбаннай холбоһук волонтер иистэнньэҥнэрэ өрөспүүбүлүкэтээҕи “Якутия с тобой” аахсыйа саҕаланыаҕыттан биир бастакынан кытталлар, диэн иһитиннэрэр «Эркээйи» хаһыат. 

Манна Майа сэлиэнньэтин олохтоох дьаһалтата күүс-көмө, өйөбүл буолар. Баһылык Алексей Неустроев бу сырыыга чүмэчинэн, дьиэ кэргэн исписэлииһэ Виктория Федорова куратордаан, ыччат исписэлииһэ Темир Сыдыкбеков массыынанан көмөлөстүлэр. Федора Наумова салайааччылаах волонтердар байыаннай дьайыыга сылдьар биир дойдулаахтарыгар олунньу 24 күнүгэр үһүс сакаастарын Ирина Саввина салайааччылаах өрөспүүбүлүкэтээҕи иис сыаҕар илдьэн туттардылар. Бу сырыыга уопсайа 111 чүмэчи оҥоһуллубута “Якутия с тобой” ыстаап пуунугар, 3 куртка, 6 футболка, ыстаан, ис таҥас кэмпилиэгэ тигиллибитэ өрөспүүбүлүкэтээҕи иис сыаҕар туттарылынна. Федора Ивановна иискэ эбии сакаас ылан аҕалла. Иистэнээччилэргэ Марта Никанорова эбиллэн күттүөннээх көмөнү оҥоро сылдьар.

Майатааҕы “Түмэн” уопсастыбаннай холбоһук волонтердара

Маны сэргэ, “Түмэн” уопсастыбаннай холбоһук көҕүлээһининэн байыаннай дьайыыга сылдьар дьоҥҥо балык хатаран ыытарга үлэ барар. Тиэлиги олохтооҕо Людмила Петрова балыгы хатаран оҥорбутун бакыаттаан ыытан уонна сүбэ биэрэн көмөлөстө. Балыгы хатырыгын ыраастаан, сууйан, духуопкаҕа хатаран, онтон мээккэлээн, итии уу куттахха балык миинэ бэлэм буолар гына оҥорон бакыаттаан ыытыахтаахтар. Манна Майатааҕы Екатерина Романова салайааччылаах “Кэнчээри”, Альбина Захарова салайааччылаах “Сардаана”, Галина Захарова салайааччылаах “Чуораанчык” оҕо уһуйааннарын үлэһиттэрэ ылсан хатарыы үлэтигэр көмөлөһө сылдьаллар.

Бу сырыыга чүмэчи оҥоруутугар Любовь Саввина салайааччылаах “Бары бииргэ түмсүүттэн” Татьяна Иванова, Михаил Сергеев, Прасковья Сергеева, Николай Винокуров, уопсастыбанньыктар Людмила Пивоварова, Евдокия Семенова, Заредина Сосина, Ариадна Филиппова, “Алгыс” түмсүү бастакы салайааччыта Мария Павловна Сивцева сиэнэ Мария Сивцева оҕотунуун Настя Сивцевалыын уонна Ольга Захарова күүс-көмө буоллулар. Кинилэри сэргэ чүмэчи оҥоруутугар, балык ыраастааһыныгар Татьяна Захарова салайааччылаах Майа оскуолатын 1983 сыллаахха бүтэрбит Екатерина Баишева, Евдокия Новгородова, Геннадий Степанов, Андрей Тастыгин, Федора Наумова үлэлээтилэр.

Людмила Дьяконова салайааччылаах “Мичил” оҕо уһуйаанын кэлэктиибэ 53 устуука блиндажнай чүмэчини оҥорон аҕалан көмөлөстүлэр.

Бу хамсааһыннарга кыттар үтүө санаалаах дьон элбээн иһэрэ манна үлэлии сылдьар дьон уонна барыбыт сүргэлэрин көтөҕөр. Майатааҕы “Дьол түһүлгэтэ” уопсастыбаннай киин аана байыаннай дьайыыга сылдьар биир дойдулаахтарга тугунан баҕарар көмөлөһүөн баҕалаахтарга мэлдьи аһаҕас.

Марелла Баишева