САХА СИРЭ. Олунньу 22 күнэ — ULUS.MEDIA. Ил Түмэн Тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин Арассыыйа бэрэсидьиэнин Туһаайыытын истэн сүргэтэ көтөҕүллүбүтүн туһунан санаатын үллэһиннэ. Кини этэринэн, Туһаайыы устата анал байыаннай дьайыы тиэмэтэ кыһыл сап курдук субуллубута саамай сөп. Ону таһынан Владимир Путин дойду сүрүн боппуруостарыгар эмиэ тохтоон ааста, олортон биирдэстэринэн тыа хаһаайыстыбатын тиэмэтэ буолла.

“Дойдубут бэрэсидьиэнэ Владимир Путин тыа хаһаайыстыбатын хайысхатыгар үлэлии сылдьар дьоҥҥо улахан махталын биллэрдэ. Кини Арассыыйа үрдүнэн саамай улахан көрдөрүү бурдук хомууругар баарын бэлиэтээтэ. Ол курдук биһиги дойдубут 55-60 мөл туораахтаах култуураны экспортыырга бэлэмин чопчулаата. Маннык ситиһии инникитин биһиэхэ кэлэ илигэ. Уопсайынан да ылан көрдөххө, бурдугу үүннэрии тыа хаһаайыстыбатын бүттүүнүн батыһыннарар салаа буолар дии саныыбын. Билигин эт-үүт бородууксуйатын уонна оҕуруот аһын оҥорон таһаарыы тэтимэ ити таһымҥа талаһыахтаах”, — диир Андрей Михайлович.

Маны сэргэ кини Владимир Путин үөрэҕирии боппуруостарын таарыйбытын сөбүлүү истибит: “Урут болҕомто сүрүннээн үрдүк үөрэх эйгэтигэр ууруллубут эбит буоллаҕына, билигин орто анал үөрэхтэри сайыннарыыга саҥа тосхоллору тобуларга сорук турда. Итини мин үөрэ иһиттим. Бу этии хаалбакка, ыкса үлэҕэ ылыллара буоллар диэн эрэнэбин”.

Түмүккэ Андрей Михайлович дьону биир сомоҕо буолан үлэлииргэ, дойдубутун салгыы сайыннарарга баар күүһү түмэргэ ыҥырда: “Федеральнай сүбэҕэ Туһаайыы нөҥүө бэрэсидьиэн дойдубут иһигэр сылдьан сайдыы туһугар үлэлиирбитигэр кыах биэрэрин туһунан эттэ. Онон, мин санаабар, хас биирдии киһи төрөөбүт сирин туһугар үлэлээтэҕинэ, кылаатын киллэрдэҕинэ сайдыы суола саҕыллыа”.