Ахсынньы 22 күнүгэр Дьокуускайга «Өрөгөй» диэн ааттаммыт спорткомплекс уораҕайыгар Улуу убайбыт Максим Аммосов 125 сааһын үөрүүлээхтик бэлиэтээһин буолла. Киэҥ-куоҥ уораҕайга ыраахтан-чугастан толору киһи мустубут.

Ил Түмэн бэрэссэдээтэлэ Алексей Еремеев тыл этэригэр М. Аммосов Саха автономията төрүттэнэригэр сүрүн оруолу ыларын тоһолоон бэлиэтээтэ. ХИФУ ректора бастыҥ студеннарга бириэмийэлэри туттартаата. Бу күн көтөн кэлбит М. Аммосов сиэнэ Максим Аммосов эһэтин, дьонун-сэргэтин туһунан кэпсээтэ.

Дьэ, ол кэнниттэн «Чаҕылхай Махсыым суолунан» диэн тыһыынчанан киһи кыттыылаах дьүһүйүү буолла. Максим оҕо сааһыттан билиҥҥи кэмҥэ диэри оонньоон көрдөрдүлэр. Улахан үлэ барбыта киһи хараҕар быраҕыллар. Киһи биир тыынынан көрөр дьүһүйүүнү оҥорбуттар. Бүтэһигэр улахан оһуохайынан түмүктэннэ. Москваттан кэлбит Максим Аммосовы Хатырык нэһилиэгин баһылыга Юрий Дьяконов арыаллаан сырытта, Ил Түмэҥҥэ көрсүһүү буолла.

Улуус дьаһалтата да, нэһилиэк дьаһалтата да улахан үлэни ыыппыттар. Хатырык дьаһалтатын баһылыгын солбуйааччы Артур Ноговицын, былдьаһа-тараһа диэххэ, Хатырыктарга анаан миэстэ анаппыт. Онон Ил Түмэн депутаттарын кытта тэҥҥэ олорон көрдүбүт. Элбэх ыччаттарбыт киирэн дьүһүйүүгэ кыттыыны ыллылар. Кырдьаҕастарбыт киирэн астынан таҕыстылар. Бу күн 85 сааһын туолбут Анна Кирсановнаны көрсөн үөрдүбүт-көттүбүт. Уопсайынан, Улуу убайбыт Чаҕылхай Махсыыммыт 125 сыла ити курдук далааһыннаахтык бэлиэтэммититтэн астынныбыт.