Кулун тутар 29 күнүгэр Дмитрий Ходулов аатынан Майатааҕы норуот тыйаатырын артыыстара Саха тыйаатырыгар «Манньыаттаах уола» испэктээги көрдөрүөхтэрэ. Туруорууну Николай Степанов «Сын монетного» айымньытыгар олоҕуран, Мэҥэ Хаҥаластааҕы Киин бибилэтиэкэ үлэһитэ Надежда Сидорова тылбаастаабыта уонна сценарийын суруйбута.
Туруорааччы режиссер ураты ньымалары туттан, испэктээк кылгас кэм иһигэр көрөөччүнү билиҥҥи уонна былыргы кэмҥэ сылдьар курдук дьүһүйэр. Көрөөччүнү киһи-аймах олоҕор улахан оруолу оонньообут чахчылар уонна устуоруйа дьалхааннаах кэмнэрэ арыаллыыр.
Масаха Мэхээс экскурсовод оруолун олус бэркэ толорор, кини уобараһа эдэр дьоҥҥо олус чугас буолла. Ол туһунан кини санаатын үллэстэр:
Гавриил Васильевич Никифоров — Манньыаттаах уола быйыл төрөөбүтэ 155 сылын туолар. Ол чэрчитинэн бу кыһын Майатааҕы норуот тыйаатырын артыыстара испэктээк туруорбуттара. Күн бүгүн биһиги Илин эҥэр, ол эбэтэр, Нам, Амма, Чурапчы, Уус Алдан улуустарыгар көрдөрдүбүт. Киһи үөрүөх, саала иһэ лыык курдук толору дьон. Ол биһигини олус үөрдэр. Салгыы бу ый 29 күнүгэр Дьокуускай куоракка Саха тыйаатырыгар көрдөрүөхпүт. Манньыаттаах уолун туһунан испэктээк бу иккис, чыҥха атын туруоруу буолар. Бастакыны, Василий Харысхал суруйуутугар олоҕуран, «Эргиллиэм хайаан да…» диэн испэктээги Саха тыйаатырын артыыстара туруорбуттара.
Бэлиэтээн эттэххэ, испэктээги көрбүт дьон Норуот тыйаатырын артыыстара оонньуур таһымнара олус үрдүгүн сыаналаабыттара. Бу испэктээк — устуоруйабытын таптыыр, кини кырдьыгын билиэн баҕалаах көрөөччүгэ ананар.
Блогер, урбаанньыт Масаха Мэхээс бэлиэтииринэн, бу икки испэктээк ис хоһоонноро тус-туһунан өрүттээх.
«Биир киһи олоҕун туһунан кэпсэниллэн баран, атын-атын өттүнэн арыллар. Биһиги туруоруубут уратыта диэн — кэлиҥҥи кэмҥэ архыыптан хомуллубут саҥаттан-саҥа бэлиэтээһиннэр, урут биллибэтэх чахчылар. Онно олоҕуран саҥа көрүүлээх, ураты хайысхалаах туруоруу буолла. Бу түгэни мүччү туппакка, испэктээги кулун тутар 29 күнүгэр Дьокуускай куораппыт Саха тыйаатырыгар, Гавриил Васильевич Никифоров олоҕун уонна кини үтүө аатын үйэтитэр сыаллаах испэктээкпитигэр барыгытын күүтэбит», — диэн түмүктүүр.
Испэктээк сүрүн дьоруойа — Гавриил Васильевич Никифоров-Манньыаттаах уола. Кини Саха сирин экономикатыгар, бэлиитикэтигэр, култуура сайдыытыгар уонна үөрэҕириигэ киллэрсибит киэҥ хабааннаах үлэтин, олоҕун суолун бүтүннүүтүн испэктээк толору арыйар.
Көрөөччү дойдуну үөһэ-таҥнары туппут уустук кэмнэри кытта алтыһыаҕа, ол саҕанааҕы устуоруйа кырдьыгын кытта арылхайдык билсиэҕэ.
Валентина Догоюсова,
хаартыскалар Масаха Мэхээс тус архыыбыттан туһанылыннылар.
Читайте нас в:
