Ааспыт өрөбүллэргэ Дьокуускайга национальнай ыстаныыларга XXII “Манчаары оонньууларыгар” кыттар быраабы ылар иһин путевкалар оонньоннулар. Аһаҕас турнир Хаҥалас улууһун баһылыгынан ситиһиилээхтик үлэлээбит Анатолий Добрянцев сырдык аатыгар ананна, диэн «Үлэ күүһэ» хаһыат суруйар.
Күрэхтэһиигэ бүтэһик путевкалар турбут буоланнар, спорт бу көрүҥэр өрөспүүбүлүкэ ааттаах-суоллаах спортсменнара бары кытыннылар. Горнай кылыыһыттара 16 бастыҥ иһигэр киирэр туһугар бары сыраларын уурдулар, күүстэрин-уохтарын биэрдилэр.
Түмүккэ, оҕолорго уонна улахан дьоҥҥо “ыстаҥаҕа” – Инесса Кузьмина, Алина Павлова, “куобахха” – Александра Павлова, Егор Захаров, үс көрүҥ (“куобах”, “ыстаҥа”, “кылыы”) түмүгүнэн Эдуард Ксенофонтов, Кай Адамов Тааттаҕа Горнай аатын көмүскүүр кыахтаннылар.
Уопсай түмүккэ, Кай Адамов муҥутуур кыайыылаах үрдүк аатын ылан сүрүн бириис хаһаайына буолла.
Анатолий Добрянцев күрэхтэһиитин иннинэ Намҥа чэпчэки атлетикаҕа өрөспүүбүлүкэ чемпионата ыытылынна. Барыта 32 хамаанда, 391 спортсмен илин-кэлин түстэ. Биһиги оҕолорбутуттан 100 м – Алина Павлова, 3000 м – Нелли Алексеева ситиһиилээхтик сүүрэннэр путевка ыллылар.
Уопсайа горнайдар 61 путевканы ылары ситистилэр. Тааттаҕа от ыйын 7-11 күннэригэр “Манчаары оонньууларыгар” спорт 11 көрүҥэр 59 спортсмен улууспут аатын көмүскүүр чиэстэннэ.
Вячеслав Алексеев
Читайте нас в:
