Бу күннэргэ “Тэтим” “Саха” НКИХ радиотыгар бөдөҥ судаарыстыбаннай диэйэтэл Ананий Кононович Андреев олоҕор уонна үлэтигэр аналлаах үс түһүмэхтээх быһа биэриини суруналыыс Альбина Тарабукина ыытта.
Бастакы түһүмэххэ Сергей Анисимов, Россия, Саха сирин ОДьКХтын Бочуоттаах үлэһитэ, Саха сирин норуот хаһаайыстыбатын үтүөлээх үлэһитэ, “Гражданскай килбиэн” бэлиэ хаһаайына, Амма нэһилиэгин, улууһун бочуоттаах олохтооҕо, РФ үлэ ветерана, Бүтүн Россиятааҕы олоҕу-дьаһаҕы хааччыйар тэрилтэлэр идэлээх Сойуустарын өрөспүүбүлүкэтээҕи кэмитиэтин бэрэссэдээтэлэ Ананий Кононович аатын олох өрө тутан, эттэххэ дөбөҥ, 15 сыл устата Таатта улууһун Дьохсоҕон нэһилиэгин кытта бииргэ үлэлээн кэлбиттэрин, сахалартан бастакы Нарком аатын үйэтитиигэ араас үлэни ыыппыттарын, Галина Арылахова, СӨ үөрэҕириитин туйгуна, РФ уопсай үөрэхтээһин Бочуоттаах үлэһитэ, СӨ ыччат политикатын туйгуна, Дьохсоҕон нэһилиэгин Бочуоттаах олохтооҕо, Ананий Кононович Андреев аатынан СӨ ОДьКХ музейын сэбиэдиссэйэ өрөспүүбүлүкэ бөдөҥ салайааччыта А.К. Андреев аатын, үлэлээбит үлэтин үйэтитии кини Дьохсоҕон нэһилиэгин баһылыгынан үлэлии олордоҕуна саҕаламмытын, Россия үрдүнэн олох-дьаһах коммунальнай хаһаайыстыба икки музейыттан биирэ Саха сиригэр, Тааттаҕа баарын, музей үлэтин-хамнаһын туһунан кэпсээтилэр.
Иккис түһүмэххэ Егор Антонов, (Россия Наукаларын академиятын Сибиирдээҕи салаатын Гуманитарнай чинчийии уонна хотугу аҕыйах ахсааннаах омуктар проблемаларын институтун “Саха сирин научнай киинин” история салаатын сэбиэдиссэйэ), историческай наука кандидата, доцент, СӨ Духуобунаһын академиятын чилиэнэ А.К. Андреев олоҕун, үлэтин чинчийбит учуонай быһыытынан кини өрөспүүбүлүкэ туһугар балысхан үлэтин суолтатын, СӨ Национальнай архыыбын научнай докумуоннарын салаатын кылаатын архивиһа Вячеслав Сивцев наука өттүнэн докумуоннары хасыһар, бичийэр киһи быһыытынан А.К. Андреев олоҕор-дьаһаҕар тахсыахтаах кинигэ иккис чааһыгар туох, саҥа, сонун докумуоннар көстүбүттэрин билиһиннэрдилэр.
Үһүс түһүмэххэ Таатта улууһун Аҕа баһылыга Айаал Бурцев 20-30-с сылларга биһиги өрөспүүбүлүкэбит чиҥник атаҕар турарыгар бары салааларынан үгүһү, кэскиллээҕи оҥорбут саха чулуу уола Ананий Кононович Андреев 125 үбүлүөйдээх сыла биллэриллибитинэн улууска туох үлэ барбытын – РНА СС ГЧуоХААНПЧИ-н кытта төгүрүк остуол ыытыллыбытын, улуус Ыһыаҕа ытык киһи аатыгар анаммытын, араас күрэстэр ыытыллыбыттарын, киинэ уһуллан тахсыахтааҕын, ГУП ОДьКХ өрөспүүбүлүкэ бары салааларын түмэн Ананий Кононович Андреев сырдык аатыгар сүгүрүйэр тэрээһиннэрэ киэҥ далааһыннаахтык ыытыллыбытын, салгыы “Үтүө дьыала” хамсааһын чэрчитинэн Дьохсоҕоҥҥо үгүс функциялаах А.К. Андреев аатынан “Саха Саарыннара” культурнай-сырдатар киин тутуллуохтааҕын туһунан эттэ. “Сахабэчээт” СӨ САТ консультант-редактора Валентина Бочонина Ананий Кононович Андреев төрөөбүт Тааттатын кытта ситимин кэпсээтэ.
Пааматынньыга туруоҕа
Бу нэдиэлэҕэ улуус баһылыга А.С. Бурцев, Андреев аатынан музей сэбиэдиссэйэ Г.Е. Арылахова Дьокуускай куорат баһылыгын Д.Д. Садовниковы, Дьокуускай куорат кылаабынай архитектора Н.А. Сергееви кытары көрүстүлэр.
Кэпсэтии сүрүннээн өрөспүүбүлүкэ, Дьокуускай куорат сайдыытыгар кэскиллээх үлэни ыыппыт, дьоһун киһибит Ананий Андреев пааматынньыга туруон сөптөөх миэстэтин, уулуссаҕа кини аатын иҥэрии туһунан кэпсэтии барда. Салгыы үлэ барыаҕа.
Ити курдук, Саха АССР Киин Ситэриилээх Кэмитиэтин уонна Народнай Комиссардар Сэбиэттэрин бэрэссэдээтэлэ, Дьокуускайдааҕы Киин электрическэй станция дириэктэрэ, Саха АССР коммунальнай хаһаайыстыбатын наркома, сахалартан бастакы үрдүк үөрэхтээх инженер-теплоэнергетик, Сэбиэттэр Бүтүн Саха сиринээҕи II, III, VI, VII, IX сийиэстэрин делегата, Саха АССР Киин Ситэриилээх Кэмитиэтин II, VI, VII, VIII сийиэстэрин ыҥырыылаах чилиэнэ, Сэбиэттэр Бүтүн Арассыыйатааҕы XIV сийиэстэрин куоластыыр бырааптаах делегата Ананий Кононович Андреев төрөөбүтэ 125 сылыгар аналлаах тэрээһиннэр ыытылла тураллар.
Валентина Бочонина
Өссө ааҕыҥ:
Ананий Андреевы көрөн турардаахпын…
Читайте нас в:
