Тыа хаһаайыстыбатын министиэристибэтэ Гражданскай оборуона уонна дьон олоҕор-дьаһаҕар куттал суох буолуутун министиэристибэтин кытта быйыл сайын от ыйын 6 күнүгэр таһаарбыт кыттыгас бирикээстэринэн уматыгы үллэрии методикатын оҥорбуттарын бигэргэппиттэрэ, итиэннэ тыа хаһаайыстыбатын табаарын оҥорооччуларга улуустардааҕы тыа хаһаайыстыбатын салалталарын нөҥүө тиксэрбиттэрэ.
Бииргэ үлэлээһин түмүгэр “Саханефтегазсбыт” АУо, “Туймаада-Ньиэп” НХ АУо, “Сервис-Ойл” уонна “СибОйл” ХЭУо-лар уматыгы отчут хаһаайыстыбаларга биэриини от ыйын 11 күнүттэн саҕалаабыттара.
Бастакы траншка 844,5 туонна сэлээркэ 19 улуус уонна “Дьокуускай” куораттааҕы уокурук хаһаайыстыбаларыгар үллэриллибититтэн бу кэмҥэ 665,5 туонната (79 бырыһыана) кутуллубут. Иккис траншка 736,8 туонна сэлээркэ 18 улууска, 2 куораттааҕы уокурукка уонна 290,6 туонна бэнсиин 16 улууска, 2 куораттааҕы уокурукка көрүллэн тыырыллыбытыттан туһааннааҕынан 37 уонна 41 бырыһыанныыта бэриллибит. Маныаха улуустарынан көрдөрүү улаханнык уратылаһар: сорохтор толору ылан, сорохтор 10-чалыы эҥин эрэ бырыһыанын туһанан олороллор.
Тоҕо сэниэлээх соҕустук биэрэн дуу, ылан дуу испэттэрий? Бастатан, аймалҕан маҥнайгы уоҕар “уматык аны төрүт суох буолуо” диэн дьаахханан, улуустар баһа соҕус үрдэтэн сайаапкалаабыттарын билинэллэр. Иккиһинэн, улуустар кииннэриттэн тэйиччи олорор, мөлтөх суоллаах-иистээх нэһилиэктэр олохтоохторо сайын-күһүн туттар уматыктарын саас кыһыҥҥы суолу баттаһа атыылаһан, хаһаанар үгэстээхтэр. Үсүһүнэн, хаһаайыстыба эрэ барыта тута элбэх уматыгы атыылаһар үбэ суох.
Аны, сүрүннээн, күһүҥҥү хомуур үлэтин харгыһа суох ыытары хааччыйар туһуттан үһүс траншка 1 607,2 туонна сэлээркэни кытта 569 туонна бэнсиин тыырыллан үллэриллэрэ торумнаммытын Тыа хаһаайыстыбатын уонна ас-үөл бэлиитикэтин министиэристибэтин сиртэн үүнүүнү ылыыга, мелиорацияҕа уонна матырыйаалынай-тэхиньиичэскэй хааччыйыыга департаменын салайааччыта Вячеслав Гаврильев иһитиннэрдэ.
Сэлээркэ көрүллүбүт лимиититтэн 425 туоннатын “Саханефтегазсбыт”, 683,2 туоннатын “Сервис-Ойл” уонна 499 туоннатын “СибОйл” хампаанньалар кутуохтара. Ону тэҥэ “Туймаада-Ньиэп” хампаанньа бэйэтин АЗС-тарыгар сэлээркэни кууһунан уонна биирдиилээн хааччаҕа суох атыылыаҕа. Бэнсиин лимиититтэн “Саханефтегазсбыт” 250, “Туймаада-Ньиэп” 74,3 уонна “СибОйл” (Дьокуускай АЗС-тарын нөҥүө) 245 туонналыыны куталлара былааннаммыт.
Вячеслав Владимирович чопчулуурунан, бастакы-иккис транштарга сүөһү аһылыгын бэлэмниир уонна ыһыыга-хомуурга үлэлиир хаһаайыстыбалар чорботуллубут буоллахтарына, бу сырыыга 2 категория эбии киллэриллибит. Олор – астыыр-үөллүүр уонна килиэп астыыр тэрилтэлэр. Биллэрин курдук, улуустарга баар астыыр-үөллүүр кэпэрэтииптэр соҕотуопканан эмиэ дьарыктаналлар, хаһаайыстыбалартан үүттэрин туталлар. Кинилэр массыыналара сүүрбэтэҕинэ, үүт аһыйара, ас хаалара – халтай ночоот буоллаҕа. Бэкээринэлэр үлэлэрин сүрүннээһин Тыа хаһаайыстыбатын уонна ас-үөл бэлиитикэтин министиэристибэтигэр бэриллибитэ. Онон уматык суоҕуттан сылтаан, бөһүөлэккэ килиэп астамматаҕына эмиэ үлэ-хамнас атахтанарыгар тиийэр. Ким аһыыр – ол үлэлиир.
Василий Никифоров
Читайте нас в:
