Тыа хаһаайыстыбатын уонна ас-үөл бэлиитикэтин министиэристибэтэ өрөспүүбүлүкэ 2026 сыллааҕы бүддьүөтүттэн үбүлэнэр ыстатыйаларыттан кырынан, 37 мөл. солкуобайтан тахса харчыны сайын ардах уутун халааныттан эмсэҕэлээбит улуустар бэйэлэрин күүстэринэн оттоон сүөһүлэрин-сылгыларын чөл кыстаталларын хааччыйар туһуттан мобильнай биригээдэлэр ороскуоттарын сорҕотун толуйууга анаан ыытыахтааҕын туһунан эрдэ иһитиннэрбиппит.
Министиэристибэ сиртэн үүнүүнү ылыыга, мелиорацияҕа уонна матырыйаалынай-тэхиньиичэскэй хааччыйыыга департаменын салайааччыта Вячеслав Гаврильев этэринэн, туһааннаах дьаһал бырайыага бу күннэргэ Экэниэмикэ уонна Үп министиэристибэлэригэр сөбүлэһиннэриигэ сылдьар.
Вячеслав Владимирович дьаһал бигэргэнэн тахса илигин быһыытынан, көмө үп кыстыкка кырыымчык оттоох киирэр туруктаах, саамай кыһалҕалаах 7 улуус отчут мобильнай биригээдэлэригэр анаан тиксэриллэр буолбутун эрэ кылгастык билиһиннэрдэ. Ол курдук, Абыйга 320, Орто Халымаҕа 240, Үөһээ Дьааҥыга 200, Сунтаарга 1 800, Кэбээйигэ 2 465, Ленскэйгэ 373, Өлүөхүмэҕэ 1 485 туонналыы, холбоон 6 083 туонна, оту ыраах көһөн тиийэн бэлэмнииллэринэн суоттаан, көмө үп тыырыллыаҕа. Манна сыһыаран, СӨ бырабыыталыстыбатын уурааҕынан “мобильнай биригээдэлэр нэһилиэнньэлээх пуунтан 40 км, ол иһигэр хотугу улуустарга 20 км тэйиччи сиргэ тиийэн оттуур буоллахтарына, көмө оҥоһулларын” санатабыт.
Василий Никифоров
Читайте нас в:
