Үөһээ Бүлүү кииниттэн 9 көс ыраах тайаан сытар Кырыкый нэһилиэгин Степан Дадаскинов аатын сүгэр ситэтэ суох оскуолатыгар быйылгы үөрэх дьылыгар уопсайа 37 үөрэнээччи үөрэх-билии кыһатын аанын арыйан киирдэ.
Айыллаана Попова быйыл үһүс кылаас үөрэнээччитэ буолла. Кини — кылааһыгар соҕотох. Бастакы кылаас үһүс чиэппэриттэн суос-соҕотоҕун үөрэнэн саҕалаабыта.
«Бастакы сылыгар кылааһыгар соҕотох үөрэнэриттэн кыратык санаата түһэр этэ. Онтон кэнники үөрэнэн, улаханнык кыһаммат буолбута. Сорудахтарын, дьиэҕэ үлэлэрин барытын эппиэтинэстээхтик толорор. Оҕом соҕотох буолан, кылаас куонкурустарыгар, күрэхтэригэр наар көтүппэккэ бэйэтэ кыттар. Кыыһым оскуолатыгар үөрэ-көтө барар, үөрэҕэр үчүгэй, чөкө, бэрээдэктээх, чуумпу, улахан оҕо курдук дуоспуруннаах. Учууталын кытта олуһун тапсаллар, иккиэйэҕин кылаастарыгар күннэрин туһалаахтык атаараллар» — диэн ийэтэ Мария Викторовна кэпсиир.
Учуутала Изабелла Степанова билиини-көрүүнү барытын оҕотох үөрэнээччитигэр тириэрдээри кыһанар.
Учуутала Изабелла Николаевна:
— Айыллаана үөрэҕэр үчүгэй. 4 уонна 5 сыанаҕа үөрэнэр. Биллэн турар, учуутал биир оҕоҕо билиини толору биэрэр уонна оннук ирдиир. Айыллаанам кылааһыгар алтыһар оҕото суоҕа ыарахаттардаах. Хайдах эрэ, оҕом курдук чугас.
Айыллаана үөрэҕи толору ылынан, иҥэринэн, үрдүк үөрэҕи баһылаан, олоҕун суолун тэлэн, нэһилиэгэр, улууһугар, өрөспүүбүлүкэбитигэр, дойдуга туһалаах киһи буола улаатарыгар алгыс тылбытын аныыбыт.
Читайте нас в:
