Авиалесоохрана пресс-сулууспата иһитиннэрэринэн, бүгүн салгынтан уонна сиринэн кэтээн көрүллэр итиэннэ хонтуруолланар сирдэргэ ойуур уотун бохсуу үлэтэ салгыы ыытыллар.
Кэбээйи улууһугар 281 гектар иэннээх тыаны сиэбит уоту Авиалесоохрана 63 десантник-баһаарынайыттан уонна “Якутлесресурс” тэрилтэ ойуур баһаарын умуруорар ыстаансыйатын 5 баһаарынайыттан турар этэрээттэр эргийдилэр.
Мииринэй оройуонугар хонтуруолланар зонаҕа үс сиргэ уот баар: 992 гектардаах уокка Авиалесоохранаттан 51 уонна Якутлесресурстан 5 киһи үлэлии сылдьаллар. Ону тэҥэ 38 673 уонна 10 968 гектардыыга тарҕаммыт уоттары утары, икки сиринэн холбоон, Авиалесоохрана 83 байыаһа, Якутлесресурс 3 үлэһитэ 14 тиэхиньикэлээх охсуһаллар.
Ньурба улууһугар 63 гектар иэннээх уокка Авиалесоохранаттан 6 десантник-баһаарынай, 41 077 гектарга тэнийбит баһаарга Авиалесоохрана 41 байыаһа уонна Якутлесресурс 12 үлэһитэ итиэннэ 39 004 гектардаах уокка 65 десантник-баһаарынай ойуур баһаарын умуруорар ыстаансыйа 11 баһаарынайын кытта 2 тиэхиньикэлээх үлэлииллэр.
Хонтуруолланар сиргэ Мииринэйгэ 20 230 уонна Үөһээ Бүлүүгэ 219 гектардаах уоттары төгүрүйэн хаайбыттарын умуруора сылдьаллар. Бастакытыгар Якутлесресурс 71 баһаарынайа 21 тиэхиньикэлээх, иккиһигэр Авиалесоохрана 60 байыаһа охсуһаллар.
Инньэ гынан муниципальнай суолталаах ыксаллаах быһыы-майгы эрэсиимэ Мииринэй, Өлөөн, Ньурба уонна Кэбээйи улуустарын сирдэригэр-уоттарыгар уһулла илик.
Василий Никифоров
Хаартыска: Саха сиринээҕи Авиалесоохрана пресс-сулууспата
Читайте нас в:
