Быйыл сайын сир аһа өлгөмнүк үүнэн, дьон айылҕа бэлэҕин үөрэ-көтө хас да биэдэрэ муҥунан хомуйда. Тутатына тобус-толору кытарчы буспут дьэдьэннээх, хаптаҕастаах иһиттэр кэчигирэһэн турар хаартыскалара социальнай ситимнэри толордулар. Дьон бултуйара, элбэх сир аһыгар тиксэрэ, биллэн турар, куһаҕан буолбатах, ол эрэн Байанай тосхойбутун киэҥ араҥаҕа ыһа-тоҕо кэпсиир наадата суох диэн норуот эмчитэ Эдьиий Дора санаатын үллэстэр. Ити туһунан кини “Эдьиий Дора алгыһынан” биэриигэ сиһилии кэпсээн турардаах.
Саха дьоно бүттүүн ытыктыыр, сүгүрүйэр киһитэ Эдьиий Дора этэринэн, киһи бэйэтигэр сөптөөх ирээтин ылан баран сиэри таһынан тахсыа суохтаах. Ити – айылҕа биэрэрин харыстаабат буолуу. “Мин көрдөһүөхпүн баҕарабын. Бу күнтэн ыла баһаалыста балыгы, сир аһын араас көрүҥүн хаартыскаҕа түһэрэ-түһэрэ ыытымаҥ. Үчүгэй көҥөс буолуохха наада. Биһиги байанайбытын, ирээппитин харыстыахтаахпыт. Хас биирдии саха киһитэ харыстыахтаах”, — диир кини.
Өбүгэ саҕаттан саха норуота ууну, балыгы, булду, сир аһын айылҕаттан босхо ылан олорор. Бу буолар биһиги баайбыт, ону ыһа-тоҕо кэпсээбэккэ, харыстыах тустаахпыт дии саныыр Федора Кобякова-Эдьиий Дора. Кини чуолаан эбэ салгынын уйгуурдубакка чуумпутук, махталлаахтык сылдьыахтаахпытын бэлиэтиир уонна айылҕаны кытта биир ситимнээхпитин умнубаппытыгар ыҥырар.
Читайте нас в:
