От ыйын 16 күнүнээҕи дааннайынан, өрөспүүбүлүкэ үрдүнэн 2 840 гектар иэннээх сир охсулунна, 1 621 туонна от кэбиһилиннэ. Онон былааннаммыт кээмэйтэн 0,38 эрэ бырыһыана туолан иһэр. Былырыын баччаҕа икки бүк элбэх кэбиһии (3 830 туонна) турбута.
Отчуттары уматык кырыымчыга кыаһылаабыта чахчы уонна сорох сиргэ “абааһы мунньаҕын” аһаран баран киирэллэригэр ардах атахтаатаҕа. Отчуоттанар кэмҥэ ходуһаҕа 1 440 звенонан 3 632 отчут үлэлии сылдьар. Ити биригээдэлэртэн толору сэбилэниилээҕэ – 448, ситэритэ суоҕа – 605, ат көлөлөөҕө – 3, сыччах хары күүһүнэн оттооччута – 384. Ходуһа хоһууннарыгар 1 406 тыраахтар төһүү буолар.
Билиҥҥи туругунан, өрөспүүбүлүкэ орто көрдөрүүтүн Үөһээ Халыма (5,55%), Алдан (2,44%), Хаҥалас (1,32%), Амма (0,89%), Нам (0,75%), Куорунай (0,65%), Чурапчы (0,57%), Кэбээйи (0,49%) улуустара куоһаран иһэллэр. Атыттар көрдөрүүлэрэ сэмэй эбэтэр букатын суох. Обургу былааннаах улуустартан Ньурбаҕа, Үөһээ Бүлүүгэ, Үөһээ Дьааҥыга, Ленскэйгэ, Томпоҕо, Орто Халымаҕа от ыйын ортотун ааһыахха диэри ахсаан арылла илик.
Тыа хаһаайыстыбатын уонна ас-үөл бэлиитикэтин министиэристибэтэ былааннаммыт 423 699 туонна оттон улуустар 404 908 туоннатын, ол эбэтэр 96 бырыһыанын толоруохпут диэн сабаҕалаан олороллорун иһитиннэрдэ. Ыйааһыҥҥа уурдахха, 18 791 туонна от. Биир орто улахан улуус сүөһүтүн-сылгытын кыстатар аһылыга. Куорунайдар былааннаах 10 532 туоннаттан 211-ин эрэ, сунтаардар 28 000-тан 26 330-тун, таатталар 30 310-тан 26 550-ун, уус алданнар 31 000-тан 28 298-ын бэйэлэрин сирдэриттэн-уоттарыттан булунарга суоттаналлар эбит.
Билиҥҥитэ мобильнай биригээдэлэри тэринэр туһунан кэпсэтии тура илик. Мантан сайын-күһүн халлаан хайдах быһыыланарыттан, быһата, күн-дьыл хаамыытыттан тутулуктаах буолуоҕа биллэр.
Василий Никифоров
Читайте нас в:
