П.Н. уонна Н.Е. Самсоновтар ааттарын сүгэр Хатас орто оскуолата бастыҥ агротехнологическай хайысхалаах оскуолалар ахсааннарыгар киирэр. 2019 сыллаахха үүнээйилэри төгүрүк сыл устата олордор, чинчийэр, кэтээн көрөр «Агрокуб» научнай лаборатория үлэтин саҕалаабыта.
Бу оскуола учуутала Айталина Шестакова сайын тиэргэнэ араас көрүҥ кэрэ сибэккилэринэн киэргэйэр. Улус.Медиа ааҕааччыларыгар анаан Айталина Егоровна бу умсугутуулаах дьарыкка хайдах кэлбитин, үүнээйини олордуу ымпыктарын-чымпыктарын кытта билиһиннэриэҕэ.
— Идэҥ ханныгый диэн арыычча ыарахан боппуруос курдук миэхэ. Тохтоло суох үөрэнэрбин сөбүлүүбүн. Миллениалы көлүөнэ үксэ оннук буолуохпут. Бэйэм медик идэтиттэн педагог буолбутум, онтон агроном. Ол икки ардыгар араас хайысхаларга эмиэ үөрэммитим. Ол курдук хас декрет бардаҕым аайы саҥа үөрэххэ киирэн испитим.
Билигин биэс оҕолоохпун, биир сиэн кыыстаахпын. Чурапчы Одьулуунугар кийииппин. Хамсык ыарыы турбутугар куораттан Хатас нэһилиэгэр көһөн кэлбиппит уонна Хатас агрооскуолытыгар үлэҕэ киирбитим.
Бу оскуолаҕа олус таһаарыылаахтык «Агрокуб» үлэлиир. Үксүгүт билэргит буолуо продукцияларын — пакетированнай собо миинэ, морс диэн оҕолор проектара бүтүн Россия таһымыгар элбэх наҕараадалаах, ситиһиилээх продукциялар буолаллар.
Оскуола сылаас теплицалаах буолан элбэх араас рассада олордорун сэргээбитим. Бу оскуола эйгэтигэр үлэлии киириэхпиттэн, сибэкки кэрэтин өйдөөн көрөр уонна үүннэрэн көрүөхпүн баҕарбытым. Бастакы сылбар алта устуука сибэккилээх этим.
«Агрокуб» үлэһит кыргыттарын ол сайын ыйытыыларбынан сылаппытым быһыылаах. Билбэтим-көрбөтүм элбэх буоллаҕа. Хата кыргыттар биирдэ да айыкка бэйэҥ быһаарыс иҥин диэбэккэ күннэри-түүннэри сүбэ бөҕө биэрбиттэрэ. Онтукаларым кынат буолбуттара диэххэ сөп.
Сибэккилэрим бэркэ үүммүттэрэ. Эргитэ сылдьан ол алта устуукабын кытта фотосет бөҕө мин. Онтон билигин тыыһынчанан олордобун уонна миигин көрөн ким эмит тэҥҥэ сибэкки олортоҕуна олус үөрэбин.
Быйыл саҥа 5-с сезоном буолар. «Новичок» буолабын буоллаҕа уопуттаах сибэкки үүннэрээччилэр быыстарыгар. Кыра ситиһиилэрдээхпин диэххэ сөп. «Зеленый кубок столицы» диэн Дьокуускай куорат күрэҕэр икки сыл кытынным.
Бастакы кыттыбыт сылбар иккис миэстэ, оттон былырыын бастакы миэстэ буоламмын үөрбүтүм аҕай. Мин девиһым — баҕалаах баҕанаҕа ыттар диэн, туох барыта кыаллар ди саныыбын.
Холобура, биһиэхэ уу ситимэ — водопровод суох, ол да буоллар харса суох сибэккинэн тиэргэммитин киэргэтэбит. Манна, биллэн турар, дьиэ кэргэниҥ өйүөн наада. Ордук уу кутааһыныгар, барыта лейканан буолан арыычча эрэйдээх.
Сүрүн күүс-уох, үп-харчы өттүн (полка оҥоруута буоллун, буор таһыыта уо.д.а. кэргэним уолаттарын кытта оҥорор. Мин буоллаҕына Пинтерес көрө-көрө манныгы баҕарабын диэхпин сөп.
Читайте нас в:
