Быйыл 65,7 тыһ. туонна үүт ыанылларын уонна соҕотуопкаланарын хааччыйарга 4,3 млрд солкуобай кээмэйдээх субвенция үбэ ороскуоттаныахтааҕыттан билиҥҥитэ 3,7 млрд солкуобайа көрүллэн турар, ол 53 тыһ. туонна үүккэ тиийэр. Онон өрөспүүбүлүкэ бүддьүөтүттэн аны 12,7 тыһ. туонна үүккэ 907,7 мөл. солкуобай эбии көрүллэрэ эрэйиллэр.
Бу дьыл кулун тутар 11 күнүнээҕи туругунан, үүт соҕотуопкалаах улуустарга уонна куораттардааҕы уокуруктарга 1,6 млрд солкуобай кээмэйдээх субвенция ыытыллыбыт. “Саха Өрөспүүбүлүкэтигэр тутуллар үүтү ааҕыы сервиһэ” сыыппара платформатын дааннайдарыгар олоҕурдахха, кулун тутар 11 күнүн киллэрэн туран, 2 799,8 туонна үүт, ол эбэтэр сыллааҕы былаантан 5 бырыһыана, тутуллан иһэр.
Билигин улуустарга уонна куораттардааҕы уокуруктарга үүт соҕотуопкатыгар субсидия ылааччылары сүүмэрдээһин ыытыллан түмүктэнэн эрэр. Сүүмэрдээһин түмүгүнэн ыаммытынан үүтү тутар уонна учуоттуур 57 соҕотуопсук быһаарыллара былааннанар.
Санаттахха, былырыын 62 288,9 туонна үүт тутуллара былааннаммыта эрээри, сыл түмүгүнэн 63 356,68 туонна үүт соҕотуопкаламмыта (101,7%). Онон, ити иннинээҕи 2024 сылы кытта тэҥнээтэххэ, соҕотуопка кээмэйэ 3 507,48 туоннанан улааппыта. Былааннаммыт кээмэйгэ 4 млрд 282 мөл. солкуобайдаах субвенция көрүллүбүтэ бүтүннүү тиксэриллибитин үрдүнэн, 2025 сыл ахсынньы 31 күнүнээҕи туругунан, 9 соҕотуопсук туппут үүтүгэр 48,9 мөл. солкуобай кээмэйдээх иэс үөскээбитэ.
СӨ бырабыыталыстыбата иэһи төлөһөр инниттэн бу дьыл олунньу 17 күнүнээҕи 52-с №-дээх уурааҕынан эрдэ таһаарбыт нуорма-быраап акталарын күүстэрин сүтэрбиттэринэн ааҕан туран, тыа хаһаайыстыбатын потребительскай кэпэрэтииптэрин өйүүргэ өрөспүүбүлүкэ судаарыстыбаннай бүддьүөтүттэн субсидияны биэрии уонна сүүмэрдээһини ыытыы бэрээдэгин бигэргэппитэ. Тыа хаһаайыстыбатын уонна ас-үөл бэлиитикэтин министиэристибэтэ сүүмэрдээһини ыытан, сөбүлэһиигэ илии баттаһан, ааспыт сыл түмүгүнэн ылар иэстээх 9 соҕотуопсукка 48,935 мөл. солкуобайы барытын кулун тутар 6 күнүгэр ыыппытын кэнниттэн соҕотуопкалыыр тэрилтэлэр бу нэдиэлэҕэ үүт туттарааччыларын кытта толору аахсыбыттарын иһитиннэрдилэр.
Василий Никифоров
СӨ Ил Дарханын уонна Бырабыыталыстыбатын пресс-сулууспатын хаартыскаҕа түһэриитэ
Также читайте:
Якутским аграриям перечислили 49 млн рублей за рекордные надои 2025 года
Читайте нас в:
