Саха сирин бары киэптээх хаһаайыстыбаларыгар 164 291 сылгы, ол иһигэр 112 640 биэ, кыстаан турар. Былырыын баччаҕа баары кытта тэҥнээтэххэ, туһааннааҕынан 4,6 уонна 4,3 бырыһыанныынан аҕыйаата. Эбии аһатыыга 37 870 сылгы, эбэтэр 23,1 бырыһыана киирдэ. Онон былырыыҥҥы туһааннаах кэмтэн сылгы кыстыга арыый ордук: 43 336 сылгы (25,2 бырыһыана) эбии аһатыллара.
Ол эрээри, быһыы-майгы барыларыгар эриэ-дэхси буолбатах. Бүгүн, кулун тутар 10 күнүгэр, тыа хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев оптуорунньук аайы ВКС эрэсииминэн ыытар мунньаҕын чопчу Абый улууһун уонна нэһилиэктэрин баһылыктарын кытта кэпсэтиигэ анаата. Биллэрин курдук, Индигиир өрүс сүнньүнэн сытар нэһилиэктэргэ хаар эрдэттэн халыҥнык түспүтэ.
Бу дьыл кулун тутар 9 күнүгэр суһаллык түмүллүбүт дааннайынан, Абый улууһугар 1 331 сылгы, ол иһигэр 873 биэ, кыстатыллар. Улуус тыатын хаһаайыстыбатын салалтата иһитиннэрэринэн, бу кэмҥэ бэтэринээрдэр 32 сылгы көнньүнэн охтубутун акталаабыттар. Төрүөтэ – хаар халыҥ буолан, кыайан хаһан аһаабакка, ыран быстарбыттар. Былырыыҥҥы кыстыкка 85 сылгы охтубута. Быйыл сылгы мэччийэр сирдэригэр хаар 70-80 см халыҥнаах дииллэр. Нэһилиэктэрдээҕи тыа хаһаайыстыбатын исписэлиистэрэ нэдиэлэ аайы сылгы туругун уонна хаар халыҥын кэтээн көрүүнү тэрийбиттэр.
Министиэристибэ уонна Абый улууһун дьаһалтата хаһаайыстыбалары сүөһү-сылгы аһылыгынан хааччыйыыга үлэлэһэллэр. Билиҥҥи туругунан, улуус 857,2 туонна оттоох. Олунньуга өрөспүүбүлүкэ киин улуустарыттан уонна Дьокуускайтан 19 туонна от, 20 туонна сенаж уонна 46,4 туонна уотурба, эбиэс тиксэриллэн турар. Бу нэдиэлэҕэ Амма улууһуттан Абый сэлиэнньэтигэр 34 туонна от тиийэрин күүтэллэр. Барыта 236,7 туонна от тиэйиллэрэ былааннанар эбит.
Кэпсэтиигэ кыттыбыт нэһилиэктэр баһылыктара хаһаайыстыбалар сылгыһыттара, исписэлиистэрэ дьаһалталар үлэһиттэрин кытта тэйиччи сытар халыҥ хаардаах мэччирэҥнэртэн сылгы үөрүн нэһилиэнньэлээх пууннар тастарыгар чугаһата сылдьалларын этэллэр. Оччотугар эбии аһатарга уонна бэтэринээрдэр дьүдьэйбит сылгылары кэтээн көрөллөрүгэр табыгастаах буолара чахчы.
Улуус ордук уустук балаһыанньалаах нэһилиэктэригэр – Абыйга, Мойуорга уонна Уолбукка кулун тутар 6 күнүттэн ыксаллаах быһыы-майгы эрэсиимин олохтообуттар. Николай Афанасьев министиэристибэ айылҕа күчүмэҕэйигэр түбэспит хотугу улуустарга сүөһү-сылгы кыстыгы этэҥҥэ туоруур аһылыга тиэрдиллэрин салгыы сүрүннэһэрин уонна сылгы ахсаана энчирэтиллибэтин хонтуруолга тутарын эттэ.
Василий Никифоров
Читайте нас в:
