Ас-үөл эргийэр киинигэр, Дьокуускай “Сайсары” бааһынай ырыынагар, куорат ыала атыылаһан сайыҥҥыга хаһаанар тоҥ аһа – эт уонна балык күһүн быһыллыбыт сыанатынан атыылана турар. Атыылааччылартан ыйыттахха, сыананы Дьахтар күнүгэр диэри халбаҥнаппат санаалаахтарын этэллэр.
Убаһа этэ бысталаммытынан киилэнэн атыылаһарга 1 800 солкуобайга диэри турар. Наар көрсөн кэпсэтэр эргиэмсиктэрим этэллэринэн, сүнньүнэн, убаһа ойоҕоһуттан ураты куҥ этин 1 300-кэ диэри түһэрсиэххэ сөп эбит. “Салгын түһээри ыксатан, хаһаас идэһэлээхтэр тыаттан күн аайы аҕалан туттара тураллар”, – дииллэр. Санаттахха, ааспыт саас кулун төрүөҕэ үчүгэй этэ.
Биир даарга эдэр кыыс кыыл таба кырбастаммыт этин 1 200 солкуобайга тиийэ сыаналаабытын көрөн соһуйдум. “Куҥ этин ордук нууччалар сөбүлээн ылаллар”, – диир. Биллэриинэн атыыга, таба аҥаарын атыылаһар буоллахха, сорохтор 4,5 мөһөөххө түһэрбиттэр. Өссө биир сиргэ “Анаабыртан дьиэ табатын этэ”, – диэн, урукку “номоҕу” кэпсээтилэр. Табаларын этин табаһыттар бэйэлэрэ күөстэнэллэр. Киин куоракка аҕалбатахтара ыраатта. Тиэйиитин ороскуота улахан итиэннэ таба ахсаанын элбэтэр дьүккүөрдээхтэр. Хаһаайыстыбалар салайааччыларын кытта сирэй кэпсэтэн, итини чуолкай билэбин. Манна, сүрүннээн, Удачнай эргин уонна Өлөөн тыаларыгар бултаммыт кыыл этин хото таһаллар.
Ааттыын тоҥ үрүҥ балык салгын сиэн, туртайбыт. Атыылааччылар ыксаан эрэллэр быһыылаах. Биир уол 1 300 солкуобай сыаналаах чыырын тыһыынчаҕа биэрэргэ бэлэмин биллэрдэ. Кыһын 650 солкуобайга диэри тахса сылдьыбыт Кэбээйи бөдөҥ собото 5 мөһөөххө диэри чэпчээбит. Баҕар, сорох даарга үрдүккэ атыыланарын таба көрбөтөҕүм буолуо. Аны “сыананы хайытта” диэхтэрэ.
Ол оннугар ырыынак дьиэтин иһигэр киирдэххэ, үрүҥ аспыт сыаната добуочча ыараабыт. Бырыһыаҥҥҥа турар атыылааччылар “улуустардааҕы астыыр-үөллүүр кэпэрэтииптэр үрдэттилэр” диэн дьиҥ иһин билбэттэриттэн буруйдууллар. Маҕаһыыннаах, лааппылаах урбаанньыттар НДС (эбиллибит сыанаҕа нолуок) саҥа сылтан 20 бырыһыаҥҥа диэри үрдэтиллибититтэн сыаналарын таһаарбыттара чахчы.
Иһиттээх, саппыйалаах дьон били сэбиэскэй саҕанааҕы кэм курдук уочараттаан туралларын, олороллорун дьиктиргээн туоһуласпытым – “Туймаада” агрохолдинг маҕаһыыныгар үүт аҕалалларын күүтэллэр эбит. Бэйэҥ иһиккэр куттаран ылар буоллаххына, лиитирэтэ 108 солкуобай үһү.
Маҕаһыынтан саарбах хаачыстыбалаах үүтү атыылаһыахтааҕар бэйэ оҥорон таһаарааччытын өйүү таарыйа хотонтон субу ыанан кэлбит үрүҥ илгэнэн утахтанар бэрт бөҕө буоллаҕа.
Василий Никифоров
Ааптар хаартыскаҕа түһэриилэригэр: “Сайсары” бааһынай ырыынагар эт-балык уонна үрүҥ ас бүгүҥҥү сыаналара.
Читайте нас в:
