«Сахабэчээт» тэрилтэтин уонна профкомун актыбыыһа, «Волонтёры Саха» түмсүү эппиэттээх волонтера Николай Васильев хаһыс да сылын «Сахабэчээт» аккумуляционнай киинин үлэлэтэн кэллэ. Аҕа дойдуну көмүскээччилэр күннэрин көрсө гуманитарнай көмө хайдах бара турарын сиһилии кэпсээтэ.
— 2024 сыл бүтэһигэр Дьокуускай куоракка Бэчээт дьиэтин иһигэр гуманитарнай көмөнү хомуйар аккумуляционнай пууну аспыппыт, — диэн сэһэргиир Николай Евгеньевич. — Биһиги «Волонтёры Саха» салаатын быһыытынан үлэлиибит, бу пуун куратора буолабын. Москваҕа, Москва уобалаһыгар, Калининградка, о.д.а. куораттарга баар госпиталларга сытар бааһырбыт уолаттарга көмө ыытабыт. Кинилэргэ Дьокуускай, өрөспүүбүлүкэ бары улуустарын олохтоохторо көмөлөһөллөр.
Бу эмиэ тохсунньуга, олунньуга гуманитарнай көмөнү хомуйан, Аҕа дойдуну көмүскээччилэр күннэрин көрсө уолаттарга ыыттыбыт. Сүрүннээн, олохтоох ас-үөл – эт, балык, бэрэскиттэн саҕалаан дьон бэйэтэ буһаран ыытар аһа-үөлэ барар. “Сахабэчээт” (салайааччы Н.М. Стручкова) үлэһиттэрэ ый аайы хамнаспытыттан кыттыһарга санаммыппыт, ол онон былырыын идэһэ кэмигэр ынах этин атыылаһан ыыппыппыт, быйыл убаһа этин атыыластыбыт, ол быыһыгар атын пуондаларга харчынан эмиэ көмөлөһөбүт. Холобур, биһиги бииргэ үлэлэһэр тэрилтэбит – Донбасс хотугулуу-илиҥҥи пуондата (салайааччы Георгий Куркутов).
Хас күн аайы уопсастыбаннай үлэ быһыытынан эдэрдиин-кырдьаҕастыын волонтердуу тахсарбыт үөрүүлээх, ордук биирдиилээн аҕам саастаах дьон көмөлөрө баһаам. Ол курдук, Никифоровтар дьиэ аймахтарыгар махталым муҥура суох. Ону таһынан уопсастыбаннай түмсүүлэр киллэрэр кылааттара эмиэ улахан. Ол курдук Кэбээйиттэн “Үтүө түгэннэр”, Үөһээ Бүлүүттэн “Балыксыт” бөлөхтөр бааллар, кинилэр сыл устата балыктаан, бултаан, биһиги нөҥүө ыыталлар. Ону таһынан АГАТУ-лары кытта үлэлэһэбит, устудьуоннар бэйэлэрин сыахтарыгар ас бэлэмнииллэр, ол курдук ынах иһин ыраастаан биэрэллэр, онон кинилэргэ махтанабыт. Итинник бука бары саба түһэн, бэлэмнээн, суһаллык ыытан иһэбит. Логистикаҕа Донбасс хотугулуу-илиҥҥи пуондата көмөлөһөр, сайаапка биэрэн, “Якутия” авиахампаанньа нөҥүө буор босхо Москваҕа диэри ыытабыт. Бурятияҕа эмиэ ыыта сылдьыбыппыт.
«Волонтёры Саха» хамсааһын туһунан кылгастык эттэххэ, Саха сириттэн араас муннуктарыттан саҕалаан Калининград куоракка тиийэ, атын да куораттарга саха волонтердара баалларын биллэрэллэр. Кинилэр Саха сириттэн кэлбит посылкалары госпиталларга илдьэн биэрэллэр. «Волонтёры Саха» хамсааһыны постпредство нөҥүө үлэлэһэр сүрүн координаторбыт Туйаара Николаевна Константинова тэрийэн, салайан, үһүс сылын тохтоло суох бааһырбыт уолаттарбытыгар миэстэтигэр көмө оҥорор. Дьокуускай куоракка «Волонтёры Саха» пуунун волонтерунан мин соҕотохпун, миэхэ кэллиэгэлэрим күүс-көмө буолаллар. Атын волонтерскай хамсааһыннар эмиэ бааллар, күүскэ үлэлииллэр, холобур, “Якутия с тобой”, “Боевые шелкопряды Якутии” уонна да атыттар. Донбасс хотугулуу-илиҥҥи пуондата гуманитарнай көмөнү эмиэ хомуйар, кини ордук инники кирбиигэ ыытар, аадырыстаах баһыылкалары илдьэн биэрэр. Биһиги үксүн госпиталларга уопсай ыытабыт, хайысхабыт оннук.
Госпиталларга сытар уолаттар махтаналлар, дойдуларын аһа доруобуйалара чөл буоларыгар көмөлөһөр. Биһиги кинилэргэ хайаан да болҕомтобутун ууран, саамай ыарахан кэмнэригэр өйөбүл буолуохтаахпыт. Кинилэргэ ас эрэ буолбакка, оскуола, уһуйаан оҕолоро суруйбут суруктара, улахан бырааһынньыктарынан эҕэрдэ суруктара тиийэллэр. Итинник психологическай өйөбүл эмиэ наһаа наада. Бааһыран сытар уолаттарбытын умнубакка, арчылыах уонна харыстыах тустаахпыт хас биирдиибит.
Түгэнинэн туһанан, Саха сирин дьонун-сэргэтин ыҥырабын, төһө даҕаны байыаннай дьайыы уһаатар, бары тулуйан, уолаттарбытыгар көмөбүтүн тохтотумуоҕуҥ. Бу маннык штабтар, волонтерскай хамсааһыннар эһиги баар буолаҥҥыт үлэлииллэр. Хас биирдиибит Дойдубут туһугар бэйэтин көмөтүн уурдаҕына, кыайыыбыт чугаһыыр!
Байыастарбытын, бэтэрээннэрбитин Аҕа дойдуну көмүскээччилэр күннэринэн итиитик-истиҥник эҕэрдэлиибин! Эһиги хорсун санааҕытынан, дойдуга халыҥ хахха, суон дурда буолар аналгытын чиэстээхтик сугэргитинэн киэн туттабыт! Дойдубут кыайарын, тулалыыр эйгэбит эйэлээх буоларын туһугар бары биир сомоҕо күүс буолуоҕуҥ, волонтерскай хамсааһын элбии турдун! Барыгытыгар чэгиэн-чэбдик туругу, энчирээбэт эрчими, булгуруйбат модун санааны баҕарабын. Чугас дьоҥҥут этэҥҥэ буоллуннар, иннигит диэки сарсыҥҥыга эрэллээхтик хардыылаан иһиэх!
Кыайыы биһиэнэ буолуоҕа! Бииргэбит!
Виктор Эверстов. Ааптар уонна Улус.Медиа хаартыскалара
Также читайте:
Как аккумуляционный пункт при «Сахапечати» и районы Якутии помогают бойцам СВО
Читайте нас в:
