Былатыан Ойуунускай аатынан СӨ Судаарыстыбаннас музейыгар Төрөөбүт тыл, сурук-бичик күнүн көрсө уонна сырдыгы тарҕаппыт Всеволод Ионов төрөөбүтэ 175 сылыгар аналлаах «Дьуонаптан саҕыллыбыт билии кыыма» быыстапка аһылынна.
Бу быыстапканы Чөркөөх икки музейа сүбэлэрин холбоон, экспонаттарын наардаан, туруордулар. Маны сэргэ Октябрьскай нэһилиэк модельнай библиотекатын сэбиэдиссэйэ Татьяна Прохорова тыл үөрэхтээх саха учуонайдара суруйбут кинигэлэринэн быыстапка ис хоһоонун дириҥэтэн биэрдэ.
Всеволод Михайлович Ионов саха дьонугар сырдыгы тарҕатааччы судаарыскай быһыытынан биллэр. Биир үйэ анараа өттүгэр алааһынан бытанан олорбут өбүгэлэрбитин ааҕарга, суруйарга үөрэтэн, хараҥаҕа тыкпыт сырдык кэриэтэ буолбута. Кини үөрэтэр оскуолата бүтүн Саха сирин үрдүнэн үтүө илдьит быһыытынан тэнийбитэ. Оҕолорго бэйэтэ “Ааҕар кинигэ” суруйан, бэл астрономия үөрэҕин кытта сэгэтэн биллэрбитэ. Кэлин сыылка болдьоҕо бүтэн киин сиргэ барарыгар муспут библиотекатын барытын Саха сиригэр хаалларбыта. Кини баай библиотекатыттан үөрэҕи сомсубуппут диэн саха алпабыытын бастакынан оҥорбут, лингвист Сэмэн Новгородов, Дмитрий Сивцев-Суорун Омоллоон ахтан хаалларбыттара баар.
Быыстапкаҕа эргийдэххэ, бу күн Чөркөөх олохтоохторо, оскуола үөрэнээччилэрэ билиигэ кыттыстылар. Тэрээһини иилээн-саҕалаан ыытар музей специалиһа Анна Борисова ыҥырыытынан ыалдьыттар төгүрүччү туран бэйэ бэйэҕэ үтүөнү баҕарсан сылгы сиэлинэн хатайданан оҥоһуллубут түү мээчиги бэристилэр. Салгыы хомус куйаар тыаһынан Туйаара Яковлева, Надежда Гоголева кэлбит ыалдьыттары эҕэрдэлээтилэр. Музей сэбиэдиссэйэ Михаил Аржаков мустубут ыалдьыттарга эҕэрдэтин тиэртэ, специалист Светлана Халгаева быыстапка туһунан сырдатта. Чөркөөх музейыгар өр сылларга үлэлээбит, бары үлэһиттэр наставниктара Изабелла Жерготова “Дьуонап оскуолатыгар” ыҥыран уруок ыытта. Оҕолор дуоскаҕа тахсан ол ыраах кэмҥэ Дьуонап учуутал оҥорбут “Ааҕар кинигэтиттэн” тыллары суруйан, кэккэ ыйытыктарга эппиэттээтилэр. Дьуонап оскуолатыгар үөрэммит Пантелеймон Попов (худуоһунньук Иван Попов быраата): «Биһигини оскуолаҕа наһаа үчүгэйдик аһатар этилэр. Манна аан бастаан пампушка, борщтаах миин испиппит”, — диэн көмүскэ тэҥнээх ахтыыта Чөркөөх музейыгар баар. Бу үтүө өйдөбүлү тилиннэрэн, чуораан тыаһатан, сынньалаҥ кэмигэр ыалдьыттарга отонноох күөрчэх уонна музей фондатын үлэһитэ Дария Кириллина анаан-минээн хара бурдуктан сибиэһэйдии килиэп оҥорон ыалдьыттары үөртүлэр.
Тэрээһин иккис чааһыгар олохтоох библиотека сэбиэдиссэйэ Татьяна Прохорова, педагогическай үлэ бэтэрээнэ Аграфена Аржакова Ийэ тыл, сурук-бичик күнүгэр аналлаах “Тыл оонньуута” интеллектуальнай оонньуу тэрийдилэр. Көхтөөх кыттааччылар, бастыҥнар Добун суругунан бэлиэтэннилэр.
Манна даҕатан бэлиэтээтэххэ, бүгүҥҥү тэрээһинтэн Изабелла Жерготова ыыппыт “Дьуонап уруога” СӨ бастакы Президенэ М.Е.Николаев аатынан библиотекаҕа «Николаев кииҥҥэ» куйаар ситиминэн ыытылынна. Бу үлэни Дария Кириллина уһулан, тута ыытан, Хаҥалас улууһун Өктөм оҕолоро көрөр кыахтаннылар.
Сырдыгы тарҕатааччы Дьуонап учуутал аата умнуллубатын, үтүөтэ өлбөөдүйбэтин.
Светлана Халгаева
Хаартыскаларга: быыстапка түгэннэриттэн
Читайте нас в:
