Ил Дархан Айсиэн Николаев Тыа хаһаайыстыбатын уонна ас-үөл бэлиитикэтин министиэристибэтин салалтатын кытта тыа хаһаайыстыбатын сайыннарыы боппуруостарын дьүүллэһэн баран, сүбэ мунньах түмүгүнэн бырабыыталыстыбаҕа, министиэристибэҕэ сорудахтары биэрдэ.
Бастатан, улуустарга ааспыт 2025 сылтан тыа хаһаайыстыбатын боломуочуйата илэ-чахчы бэриллэн, өрөспүүбүлүкэ бүддьүөтүттэн тиксэриллэр үбү бэйэлэрин көрүүлэринэн талбыт хайысхаларыгар угаллара көдьүүстээх буолбутун бэлиэтээн туран, үүтү тутуу кээмэйэ иллэрээ сыллааҕы көрдөрүүнү 5 тыһ. туонна кэриҥинэн куоһаран, 63 356 туонна үүт соҕотуопкаламмытын ситиһии быһыытынан сыаналаата. Ол гынан баран, былааннаммыт кээмэйтэн аһара толорбут 8 улууска 60 мөл. солкуобай тиксэриллибэтэҕин бырабыыталыстыба бу дьыл олунньу 19 күнүгэр диэри быһаарарыгар сорудахтаата.
Иккиһинэн, министиэристибэ быйыл улуустарга 56 тыһ. туонна үүтү туталларыгар тиэрдибит былаана былырыыҥҥы таһымтан биллэрдик намтатыллыбытын кытта сөбүлэспэтин биллэрдэ. “Тыа хаһаайыстыбатын сүрүн соруга бэйэ оҥорон таһаарар чэгиэн аһын-үөлүн дэлэтии буоларынан, хайа даҕаны түбэлтэҕэ соҕотуопка кээмэйин кыччатыа суохтаахпыт, төттөрүтүн үүннэрэн иһиэхтээхпит”, – диэтэ уонна өрөспүүбүлүкэ 2026 сылга ыаммытынан үүтү тутар кээмэйин 65 тыһ. туоннаҕа таһаарарга ыйда, онуоха улуустар уонна соҕотуопкалыыр тэрилтэлэр тыа хаһаайыстыбатын табаарын оҥорооччулары өйүүр кээмэйдэрин ааспыт сылтан намтатыа суохтаахтарын тоһоҕолоон эттэ.
Тыа хаһаайыстыбатын уонна ас-үөл бэлиитикэтин министиэристибэтин астыыр-үөллүүр бырамыысыланнаска салаатын салайааччыта Егор Чичигинаров туруоруллубут сорудахтар хайдах быһыылаахтык толоруллуохтарын туоһуласпыппар кылгастык маннык хоруйдаата:
– Дьиҥинэн, ити кредиторскай иэс соҕотуопкалыыр тэрилтэ уонна үүт туттарааччылар икки ардыларыгар быһаарыллыахтаах боппуруос. Ол гынан баран, үөскээбит быһыыны-майгыны өйдөөн туран, балаһыанньаттан тахсар суолу тобула сатыыбыт. Ил Дархан дьаһалыгар тирэҕирэн, Бэрээдэги сөбүлэһиннэриигэ “сүүрдэ” сылдьабыт. Бу сорудах улуустарга бэйэлэригэр эмиэ сыһыаннаах.
Аны быйылгы былаан туһунан этэр буоллахха, үүт соҕотуопкатын кээмэйэ улуустар киллэрбит билгэлээһиннэригэр олоҕуран ылыллар. Онон быйылгы бүддьүөккэ 56 тыһ. туонна үүккэ суоттанан, 3 млрд 711 мөл. солкуобай үп көрүллэн турар. Урукку сылларга статистика дааннайдарыттан таһаарар этибит. Кэлин социальнай-экономическай сайдыы бырагырааматынан сирдэтинэбит. Хас биирдии улуус сайдыытын торумнуур былааннаах, олорго ыйыллыбыт көрдөрүүлэрин түмтэххэ, Ил Дархаммыт даҕаны модьуйарын курдук, 2026 сылга 65 тыһ. туонна үүтү тутуохтаахпыт. Саба быраҕан, эбии 9 тыһ. туонна үүт соҕотуопкаланарыгар 711 мөл. солкуобайы көрдүүбүт.
Василий Никифоров.
Хаартыска «Олекма» хаhыат.
Читайте нас в:
