Өбүгэбит төрүт үгэһинэн бүгүн, тохсунньу 31 күнүгэр, дьыл муҥутуур оройо бэлиэтэнэр. Ол аата Бокуруоптан, алтынньы 14 күнүттэн, 110 хонук баранан, аны сааскы Ньукуолуҥҥа, ыам ыйын 22 күнүгэр, диэри 110 хонук хаалар. Саха ыала кыбыытыгар кэбиһиилээх отун хайа охсубут аҥаара баар буоллаҕына, дьылы этэҥҥэ туоруур буолбутунан ааҕынара.
Өбүгэбит ити “суруллубатах сокуона” сүөһүлээх-астаах тыа сирин ыалларыгар уонна хаһаайыстыбаларыгар суолтатын күн бүгүнүгэр диэри сүтэрэ илик. Быйылгы кыстыкка Саха сирин бары киэптээх хаһаайыстыбалара 430 345 туонна оттоох, 30 718 туонна сиилэстээх, 14 783 туонна сенажтаах киирбиттэрэ.
Мантан, бу дьыл тохсунньу 29 күнүгэр улуустартан хомуйуллубут сыыппараларынан сирдэттэххэ, 252 450,70 туонна от (58,66 бырыһыана) итиэннэ сүөһү сүмэһиннээх аһылыгар 16 895 туонна сиилэс уонна 6 143 туонна сенаж хаалбыттар.
Отчуоттанар кэмҥэ өрөспүүбүлүкэ бары киэптээх хаһаайыстыбаларыгар хотоннорго 145 617 ынах сүөһү уонна сыһыыларынан, далларынан 165 446 сылгы кыстаан тураллар. Уһуннук күүскэ тымныйан, аһаҕас халлаан анныгар сылдьар сыспай сиэллээхтэри тургутан көрдө. Бу кэмҥэ 23 927 сылгы, ол эбэтэр бүттүүн баартан 14,5 бырыһыана, эбии аһылыкка турда.
Сунтаарга 8 316 (88,3%), Ленскэйгэ 1 124 (85,2%), Куорунайга 3 314 (68,7%), Ньурбаҕа 3 343 (34,2%), Уус Маайаҕа 295 (29,7%), Хаҥаласка 4 079 (27,6%), Үөһээ Бүлүүгэ 1 849 (24,1%), сылгыларын аһаталлар.
Онон бүтүннүү саба быраҕан көрдөххө, хаһаайыстыбалар сүөһүлэрин-сылгыларын быр-бааччы кыстатар аһылыктаахтар курдук эрээри, барыларыгар эриэ-дэхси буолбатах. Дьиҥинэн, адьас быстаран эрэр суох. Сайын ардах уутун халааныттан икки төгүллээн улаханнык оҕустарбыт Өймөкөөҥҥө киин улуустартан эбии оту тиэйии кыһалҕата өссө ааспыт күһүн суһаллык быһаарыллан турар.
Ону таһынан эмиэ Индигиир халааныттан эмсэҕэлээбит Муомаҕа, Абыйга, от кыайан үүммэтэх Эбээн Бытантайга, Үөһээ Дьааҥыга, Томпоҕо, Мииринэйгэ тастан оту тиэйтэриигэ сайаапкалаахтар.
Тыа хаһаайыстыбатын уонна ас-үөл бэлиитикэтин министиэристибэтин оперативнай ыстааба 1 704,16 туонна оту тиэйии ороскуотун толуйарга ылыммытыттан бу кэмҥэ Мииринэй улууһугар 300 туоннаттан аҥаара, Томпо улууһугар 684,70-тан 367 туонната, Эбээн Бытантайга 184,48-тан 85 туонната, Үөһээ Дьааҥыга 406,44-тэн 100 туонната тиксэрилиннилэр. Муома, Абый хайысхатыгар кыһыҥҥы суол өссө арылла илик.
Василий Никифоров
«Мүрү саһарҕата» хаһыат хаартыската
Читайте нас в:
