Үгүс көлүөнэ ааҕааччы кутун туппут, саха норуотун литературатын, тыйаатырын, ойуулуур-дьүһүннүүр искусствотын, киинэтин, духуобунай култууратын летопиһын быһыытынан уустук кэмнэри уҥуордаан, күн бүгүҥҥэ диэри кэлбит «ЧОЛБОН» сурунаал быйыл үйэлээх үбүлүөйүн уруйдуу бэлиэтиэ.
Сурунаал биир чаҕылхай бырайыагынан өрөспүүбүлүкэтээҕи «Чолбон өй күрэһэ. Улахан оонньуу» буолар. Таһаарыы үйэлээх үбүлүөйүгэр уонна сурунаалы төрүттээччи, бастакы эрэдээктэр Анемподист Софронов-Алампа төрөөбүтэ 140 сылыгар ананан оонньуу үһүс төгүлүн ааспыт сыл ахсынньытыгар 9 улууска уонна Дьокуускай куоракка ыытыллыбыта. Уопсайа 63 хамаанда, ол эбэтэр 189 киһи, кыттыыны ылла.
Бүгүн Бэчээт дьиэтин уораҕайыгар «ТУЙГУННАР ТУРГУТУКТАРА» түһүмэххэ Хаҥалас, Горнай, Нам, Таатта, Чурапчы, Мэҥэ Хаҥалас, Уус Алдан, Бүлүү улуустарыттан уонна Дьокуускай куораттан үстүү киһилээх 9 хамаанда күөн көрүстэ.
Дьүүллүүр сүбэ чилиэнэ, «Сахабэчээт» медиахампаанньа бас дириэктэрэ Ньургуйаана Стручкова:
«Быйыл сэтинньи 2 күнүгэр «Чолбон» сурунаал 100 сыллаах үбүлүөйүн бэлиэтиирдии тэринэр. Бүгүн саха суруйааччыларын айымньыларын уонна кинилэр олохторун-дьаһахтарын, айар суолларын таарыйар ыйытыылардаах олус интэриэһинэй, көхтөөх күрэс буолла. Сарсын тиһэх киирсиини күүтэбит».
Бэлиэтээн эттэххэ, оонньуу олус сэргэхтик барда. Ыытааччы — «Чолбон» сурунаал эппиэттиир сэкирэтээрэ Туяра Павлова түөрт түһүмэхтээх полуфинал оонньуутун олус чэпчэкитик, көхтөөхтүк тэрийэн ыытта. Ыраахтан-чугастан кэлбит хамаандалар бары олуһун умсугуйан оонньообуттара тута харахха быраҕылынна, көрөөччүлэр интэриэстэрин күүһүртэ.
Түөрт түһүмэх түмүгүнэн «Кылаан тургутук» оонньууга кыттар хамаандалар ааттара трибуна үрдүк чыпчаалыттан дуорайда. Ол курдук, 3-с миэстэни 31-дии очкуону суруммут Уус Алдан «Ааҕар Лөгөй» уонна Мэҥэ Хаҥалас «Эркээйи» хамаандалара ыллылар, 2-с бочуоттаах миэстэҕэ 33 бааллаах Дьокуускай «Саха салаата 07» оонньооччулара тахсан, дуоһуйдулар. Итиэннэ, кыайыыны 34 баалы ылбыт Чурапчы улууһун «Үргэл» өркөннөрө үөрүү үрдүк өрөгөйүн биллилэр. Финалга тахсыбыт хамаандалар сарсын «Саха» НКИХ быһа эфиригэр күөн көрсүөхтэрэ.
Ааптар хаартыскаҕа түһэриитэ
Читайте нас в:
