«Чолбон» сурунаал тохсунньутааҕы нүөмэрэ таҕыста

«Чолбон» сурунаал 2026 сыл тохсунньутааҕы нүөмэригэр:

— Саха омук нация суолун төрдүгэр үктэниитигэр «Чолбон» сурунаал туох суолталааҕын туһунан бас эрэдээктэр Гаврил Андросов ««Чолбон» иккис үйэ модьоҕотугар үктэннэ» ыстатыйата;

— Суоһааны «Сэттэ номох» кэпсээнэ;

— Ульяна Захарова тыа ыала куоракка көhөн олохторо огдолуйа сыспытын туһунан «Таас дьиэ» кэпсээнэ;

— Аһыы аһы амсайарын туохтааҕар да ордорор Сахаар Саабыны көнө суолга Таҥха кэмэ хайдах туруорбутун туһунан Ангелина Васильева ««Өлөн» баран тиллии эбэтэр сүллүүкүн тириитин кэтэ сылдьыбыт киһи» кэпсээнэ;

— Михаил Жирков «Кутуунньа» кэпсээнигэр Аҕа дойду Улуу сэриитин ыар аһыыта;

— Норуот поэта Саргы Куо хаһан да уостубат күн күбэй ийэҕэ таптал туһунан «Ийэм дьикти кэһиитэ – кыһыл дьаабылыка» поэмата;

— Олоҕун орто омурҕаныгар сылдьар Геннадий Бечеряков «Өһөн эрэр кутааттан төлөн тыла быгыалыыр…» олоҕу ырытар хоһоонноро;

— Хотууна оҕолорго анаан «Дьолу бэлэхтиир эмээхсин остуоруйалара»;

— Байыаннай дьайыы кыттыылааҕа Дмитрий Филиппов дойдубутун көмүскүүр дьон дьоҥҥо көмөҕө кэлэргэ өрүү бэлэмнэрин туһунан «Космоска хаһан көтөбүт?» кэпсээнэ Лилия Иванова тылбааһыгар;

— Аатырбыт артыыспыт Герасим Васильев олоҕун остуоруйатын кылгас кэрчиктэрэ Утум Захаров «Эриирдээх-мускуурдаах олохтон – ат уорҕатыгар» ыстатыйатыгар;

— Николай Николаев «1924–1925 сыллардааҕы тоҥустар бастаанньаларын саҥа хараҕынан» ыстатыйата;

— «Биллиилээх суруйааччылар биографиялара» рубрикаҕа Рустам Каженкин үчүгэй ис хоһоонноох саха сэһэнин санатар олохтоох норуот суруйааччыта Н.Е. Мординов-Амма Аччыгыйа туһунан «Амма Аччыгыйа. Саха литературатын сааскы кэмэ» ыстатыйата;

— Учуутал Инара Федорова Геннадий Бечеряков «Чуумпуга…» хоһооннор-ырыалар хомуурунньугун ырытыыта;

— Константин Эверстов «Сэргэлээххэ сэргэх күннэр» 80-с сыллар бүтүүлэригэр, 90-с сыллар саҕаланыыларыгар устудьуон олоҕун кэпсиир сэһэнигэр ааҕааччы санаата;

— Оҕолорбут барахсаттарга «Бөрө уонна өсүөл» Албания норуотун остуоруйата Николай Якутскай тылбааһыгар.

Күн–сири, «Чолбон» – саханы сырдатар!

Алгыһы кытта «Чолбон» сурунаал