Чурапчы нэһилиэгин олохтоохторугар Ирина Дмитриевна уонна Михаил Михайлович Пермяковтарга ыалдьыттыахха. Санатар буоллахха, ыал ийэтэ Ирина Дмитриевна – өрөспүүбүлүкэтээҕи «Далбар Хотун–2012» күрэс кыайыылааҕа. Пермяковтар үс оҕолоохтор, элбэх сиэннээхтэр. 2017 сыллаахха саха ыалын сиэринэн тэлгэһэлэригэр балаҕан туттан дьэндэппиттэр. Өр сыл иитиэхтии сылдьыбыт ыра санааларын,
оҕолоро улаатан, үлэһит дьон буолан, олоххо киллэрбиттэр. Ол курдук, уолаттар аҕаларын кытта икки сыл курдук тутан, силигин ситэрбиттэр, диэн «Далбар Хотун» сурунаал сырдатар.
Былыргы балаҕаны үтүгүннэрэн хаттык өһүөлээн, ньиэмэстии муннуктаан туппуттар. Ис өттүнэн 7 да 7-лээх, акылаата тиит мастан оҥоһуллубут, оттон эркинэ, муостата – бэс. Хара муостата суох.
Түөрт түннүктээх, биэс кэтит наара оронноох. Көмүлүөгү хаһаайын бэйэтэ оҥорбут. Уопсайа үс сүүсчэкэ кирпииччэ туттуллубут.
«Оһохпут олох буруолаабат, олус үчүгэйдик тардар. Былырыын күөх төлөҥҥө холбономмут, алтынньыга диэри олорбуппут. Ардахтаах күҥҥэ көмүлүөкпүтүн оттобут. Умайар тыаһын истэ-истэ, сылааһыгар угуттанабыт, оҕо сааспытын саныыбыт», – диэн Ирина Дмитриевна киэн тутта кэпсиир.
Киэҥ-куоҥ балаҕан улахан дьиэ кэргэни, халыҥ аймаҕы түмэргэ олус табыгастааҕын бэлиэтииллэр. Оннооҕор сиэннэрэ сөбүлээн мусталлар эбит. Ис бараанын хаһаайка бэйэтэ киэргэтэр, симиир. Ордук аныгылыы дизайны тутуһан оҥорбуттар. Төрөппүттэриттэн хаалбыт күндү маллары көстүүлээх сиргэ кичэйэн уурбуттар.
«Куоракка олорор сиэннэрбит сайылыы кэллэхтэринэ, саха буолалларын санатар балаҕаннаахпыт олус үчүгэй», – диэн хаһаайыттар санааларын үллэстэллэр.
Түмүккэ балаҕан туттуон баҕалаах дьоҥҥо Михаил Михайлович бу курдук сүбэлиир:
«Кэнники кэмҥэ балаҕаны хото туттар буоллулар. Сорохтор муннугун остуолба гыналлар. Ол балаҕан ис бараанын сымсатар дии саныыбын. Ньиэмэстии муннуктаах балаҕаннар ис барааннара ордук тупсаҕайдык көстөр. Хаттык өһүөлээх тутуу эмиэ улахан оруолу оонньуур: наараҕа олорорго, сытарга табыгастаах, төбөҕүнэн эркиҥҥэ анньылла сылдьыбаккын. Оттон көмүлүөк үөһээҥҥи турбата кыратык кэннин диэки иҥнэри буолара ордук. Оччоҕо оһох тардара күүстээх уонна айаҕынан буруолаабат. Ону таһынан үөлэһэ, айаҕа үрдүк, киэҥ буолуохтаах. Ол сырдыгы, сылааһы биэрэригэр туһалыыр. Оҕолоргутун, ыччаккытын кыра эрдэхтэриттэн сахалыы эйгэҕэ сыһыаран иитэн-такайан таһаарыҥ диэн баҕа санаабытын тиэрдэбит».
Венера Охлопкова
Читайте нас в:
