Саха халандаарынан кэлэр 2026 сыл — Үрүҥ Айыы Тойон сыла. Үрүҥ Айыы Тойон — дьоҥҥо сырдыгы, сылааһы, үтүөнү сыдьаайар, сир үрдүгэр баар бары тыынар тыыннаах олоҕун түстээччи Күн Таҥарата. «Үөһээ Бүлүү» хаһыат кэрэспэдьиэнэ алгысчыт, тойуксут Трофим Мироновтан — Бэргэнтэн дьиэни хайдах ыраастаан, саҥа сылы сөпкө көрсөрү туоһуласта.
– Дьиэҕитин ыраастыырга үөрэ отун эбэтэр боҕуруоскайы буруолатан ыраастанаҕыт. Ол суох буоллаҕына, чүмэчи уматан, чуораан тыаһатан, дэйбииринэн сапсыйан ыраастанаҕыт. Ону кытта алгыс тылынан кэлэр сыл үтүөнү тосхойдун диэн эҕэрдэлэһэҕит. Наһаа ураты алгыс наадата суох дии саныыбын.
– Кэлэр сыл Илиҥҥи гороскобунан Уот кыһыл Ат сыла. Сылгы саха киһитигэр ордук чугас буоллаҕа дии. Бу сылы көрсө остуолга сылгы этин уурбаккыт дииллэр. Маныаха эн санааҥ?
– Оннук, сорохтор уураҕыт, сорохтор уурбаккыт дииллэр. Мин санаабар, маанылаах аспытын саҥа дьыллааҕы остуолга уурар буоллахпыт.
– Ааҕааччыларга баҕа санааҥ…
– Саргылаах Саҥа дьылынан, үтүө майгылаах Ат сыла тиийэн кэлбитинэн итии-истиҥ эҕэрдэ буолуохтун! Үөһээ үрдүк айыыларбыт эһиэхэ үтүөнү эрэ төлкөлөөтүннэр, кэрэни эрэ кэрэһэлээтиннэр! Эһиги тус олоххутугар уонна дьиэ кэргэҥҥитигэр үтүмэн үгүс үөрүү-көтүү, үрдүктэн үрдүк ситиһии тосхойо туруохтун! Алаһа бараан дьиэҕитигэр ыарыы ыалласпатын, тумуу тумуннун, дьаҥ-дьаһах дьалты хаамтын! Иэримэ дьиэҕитигэр ил-эйэ эрэ олохсуйдун, дьол-соргу эрэ уйаланнын! Айыыһыккыт аргыстаһа сырыттын, Иэйиэхсиккит эҥээрдэһэ сырыттын! Этэҥҥэ буолуҥ!
– Махтал, үтүө тылларыҥ хас биирдиибитигэр тиийдин! Кэлэн иһэр Саҥа дьылынан!
Мария Васильева
Читайте нас в:
