Иван Бочонин салайааччылаах «Тааттавтодор» тэрилтэ ааһан эрэр сылы үлэҕэ-хамнаска үрдүк ситиһиилээхтик түмүктүүр.
«Тааттавтодор» сыл устата 760 мөл. суумалаах үлэни-хамнаһы — «Халыма» федеральнай суолун 175 км уһуннаах, Уолба, Уус Таатта, Ытык Күөл-Харбалаах-Чычымах 105 км уһуннаах суолларын көрүүгэ-истиигэ үлэлээтэ. Ол иһигэр быйыл 2025 сыллаахха улууска XXII өрөспүүбүлүкэтээҕи «Манчаары Оонньууларын» көрсө бэрт кылгас кэм иһигэр, от ыйын 7 күнүгэр диэри маннык үлэлэри толорон оонньуулар үрдүк таһымнаахтык ыытыллан барыыларыгар дьоһун кылаатын киллэрдэ: Ытык Күөлгэ «Саханефтегазсбыт» тэрилтэ заправочнай станциятыгар барыта 6691 м2, АЗС-тан саҕалаан 2,4 км усталаах Харбалаахтыыр суолу, Н.Е. Мординов-Амма Аччыгыйа аатынан уулуссаҕа 586 миэтэрэ усталаах, А.Е. Кулаковскай-Өксөкүлээх аатынан уулуссаҕа муоста икки өттүгэр 200 м усталаах аспаал суоллар оҥоһуллан үлэҕэ киирдилэр.
А.Е. Кулаковскай-Өксөкүлээх уулуссатыгар 41,2 миэтэрэ усталаах муоста, ипподромҥа 1600 миэтэрэ усталаах аттар сүүрэр суоллара, “Халыма” федеральнай суолугар эрдэттэн бэлиэтэнэн барыта 18 км усталаах суол, анал техникалары туттан, стабилизация ньыматынан оҥоһулуннулар. Балар түмүктэригэр 2024 сыллаахха үнтү кэһиллибит суол көнөн, Оонньууларга кэлбит ыалдьыттар кыра массыыналарынан туох да иҥнигэһэ суох айаннаан сырыттылар.
«Манчаары Оонньууларын» көрсө ипподром тутуутугар сметаны таһынан 3500м3 кумаҕы, Ытык Күөлгэ икки хаарбах дьиэни ыраастааһыны, нэһилиэк баһылыга В.А. Охотин туруорсуутунан Боробул бөһүөлэгэр СӨ транспорын министерствотын кытта кэпсэтэн, Уус Таатталыыр суолга турбут САРМ муостаны аҕалан туруорууну, муостаҕа киирии суолларын оҥорууну тэрилтэ бэйэтин суотугар оҥордо.
2022 сыллаахтан тэрилтэ генеральнай директора И.И. Бочонин Мас тардыһыытын федерациятын салайан, кэлэктиип мас тардыһыытын сайдыытыгар төһө кыалларынан көмөлөһөн, үлэлээн-хамсаан кэллэ. Быйыл Манчаары Оонньууларыгар Федерация ситиһиитэ улуус дьонун үөрдэр. Оонньууларга миэстэлэспит Таатта спортсменнарыгар Федерация аатыттан тэрилтэ үс матассыыкылы, 330 тыһыынча харчынан бириистэри үөрдэ-көтүтэ туттарда.
Бу сыл түмүгүнэн Таатта улууһун үрдүнэн «Тааттаавтодор» тэрилтэ салайааччыта Иван Бочониҥҥа «Бастыҥ меценат» анал аат иҥэрилиннэ.
Ааһан эрэр сылга тэрилтэ уһуннук, таһаарыылаахтык үлэлии–хамсыы сылдьар кэллиэгэлэр – биригэдьиир Василий Павлович Бабанов «РФ суолун Бочуоттаах үлэһитэ» үрдүк аата иҥэриллибитинэн, суоппардар Юрий Иванович Толстоухов, Федор Николаевич Филатов РФ транспорын министрин махтал суруктарынан наҕараадаламмыттарынан киэн туттар.
Т.М. Никифорова, Биир идэлээхтэр Сойуустарын бэрэссэдээтэлэ
Читайте нас в:
